Bashkia e Tiranës i jep 10 ditë afat partisë Fryma e Re Demokratike, për të liruar zyrat e godinës. Në shkresën drejtuar kësaj force politike, bashkia e Tiranës, kërkon lirimin vullnetar të ambjenteve brenda datës 23 mars 2021.
“Ju bëjmë me dije se brenda datës 23.02.2021 të merrni masa për lirimin vullnetar si dhe dorëzimin e ambjenteve të cilat janë kaluar për administrim në Drejtorinë e Përgjithshme të Objektivave Publike me urdhër të Kryetarit të Bashkisë”, thuhet në shkresë.
Lidhur me këtë afat ka reaguar dhe kreu i FRD-së, Sali Shehu. Në një deklaratë për media, Shehu tha se nuk ka ndërmend të lirojë zyrat. Ai u shpreh se do të presi vendimin e gjykatës dhe më pas do të veprojë.
“Këto nuk janë akte banditeske, nëse ky dokument do kishte ardhur ditën e parë s’do kishte ndodhur kjo ngjarje por do ishim në gjykatë duke e zgjidhur këtë situatë sipas ligjit. Ne jemi në godinë do vazhdojmë fushatën i njoftova të na lirojnë kushtet duke na lëshuar energjinë. Do marrim vendimin e gjykatës si të vendosë gjykata do veprojmë. Me vendim të gjykatës do ecim. Më lejoni tu përqafoj tu jem mirënjohur për të gjithë mbështetjken që i keni dhënë FRD. Kjo ishte një përballje midis të mirës dhe të keqes”, tha Shehu.
Ai siguron Veliajn se pas 25 prillit FRD do të jetë jo vetëm me mbi 1% të votave në total, por edhe në parlament dhe në qeveri madje e siguron se do të bashkëpunojë edhe me Bashkinë e Tiranës.
Kujtojmë se këto zhvillime vijnë një ditë pas pas tensionit të krijuar në ambjentet e FRD, ku punonjës të policisë bashkiake mbërritën në godinë për lirimin e ambjenteve.
Paraditen e së premtes Presidenti Meta ishte në zyrat e FRD-së, pas konktaktit që pati me kreun e kësaj partie. Meta ndërhyri personalisht për të larguar Policinë Bashkiake, e cila ndodhej atje në zbatim të një vendimi për lëvizjen e FRD-së nga godina në pronë të Bashkisë Tiranë.
Meta e ka konsideruar si një vendim të pastër politik kundër FRD-së e cila ka nënshkruar marrveshjen e bashkëpunimit me koalicionin opozitar për zgjedhjet e 25 Prillit.
