Ditën e djeshme kryeministri Rama dhe ministrja e sipërmarrjes Delina Ibrahimaj zhvilluan një takim me sipërmarrësit në vend. Nuk munguan pakënaqësitë nga ana e sipërmarrsëve për çështje të caktuara që i prekin ato në mënyrë të drejtpërdrejtë.
Fatjon Hoxha, drejtuesi i kompanisë së ndërtimit “NG Structures” ngriti zërin për problemin e tij, teksa tha se Bashkia e Tiranës nuk i po i miraton dy leje ndërtimi që prej vitit 2022, edhe përse është në rregull me të gjitha procedurat.
Hoxha theksoi se institucioni i drejtuar nga Erion Veliaj është në shkelje të VKM-së 408, por askush nuk flet sepse ka frikë se nuk mund të marrë më leje ndërtimi nga Bashkia e Tiranës. Gjithashtu ndërtuesi akuzën e tij e çoi më larg duke shtuar se ka shumë të tjerë si ai që kanë frikë të flasin pasi kanë frikë se nuk do të marrin më leje ndërtimi.
Nga ana tjetër Ibrahimaj luajti rolin sikur nuk e njeh realitetin në vendin tonë, duke insistuar në pyetjen se nga kush mund të kishin frikë ndërtuesit.
Diskutimi mes tyre:
Fatjon Hoxha: Më vjen keq që kryeministri u largua dhe nuk na dëgjon. Unë jam Fatjon Hoxha, i kompanisë “NG Structure”, shoqëri ndërtimi. Jam në proces të dy lejeve që kam aplikuar prej vitit 2022 dhe Bashkia e Tiranës e ka shkelur VKM 408 me të paktën 10-fishin e kohës. Çfarë faji kemi ne që të jemi peng të taksës së re?! Ne i përqafojmë taksat dhe jemi gati t’i paguajmë të gjitha.
Delina Ibrahimaj: Në dijeninë time, nuk jam informuar së fundmi, por Bashkia e Tiranës ende nuk e ka kaluar në Këshillin Bashkiak, Vendimin e Këshillit të Ministrave për rishikimin e çmimeve të referencës, në dijeninë time. Pret një vendim unifikues nga Ministria e Ekonomisë që të zgjidhë ato problematika që ju përmendët, pra ato lejet që kanë qenë në proces, si do veprohet, do aplikohet apo nuk do aplikohet. Unë do interesohem patjetër dhe do ju bëj me dije se çfarë vendimi do të dalë.
Fatjon Hoxha: Se kryeministri tha që ju edhe mund ta anuloni lejen, por ne e kemi paguar 1% në fillim të vitit. Nuk janë gjëra që bëhen thjesht me fjalë, janë edhe pagesa që janë bërë. Të na i kthejnë mbrapsht, unë e refuzoj lejen nëse më lënë në këto kushte dhe shkoj në gjykatë.
Ibrahimaj: Qartë
Hoxha: Se shumë ndërtues heshtin se ka frikë.
Ibrahimaj: Po nuk kanë çfarë frikë të kenë
Hoxha: Jo kanë frikë, se…
Ibrahimaj: Çfarë frike mund të ketë një ndërtues që është sektori që ka rritjen…
Hoxha: Dikush më tha mua që nuk marrim më lejen në Bashkinë e Tiranës. Jo! Unë zbatoj ligjin, procedurën, VKM dhe do vazhdoj. Nëse nuk ma japin, do largohem nga Shqipëria.
