Gjykata e Posaçme e Apelit ka rikthyer në burg biznesmenin Ervis Lami, i cili mori një masë më të butë sigurie nga shkalla e parë, pasi akuzohet se ka bashkëpunuar në korrupsion me ish-kreun e ARRSH-së Evis Berberi.
Më herë Prokuroria e Posaçme ka sekuestruar pasuritë e Lamit, pra kompaninë e tij DAAM shpk dhe 5 sipërfaqe toke në emrin e kësaj kompanie.
Ervis Lami administronte këtë kompani, e cila në fakt nga hetimet e SPAK është faktuar se DAAM ndodhet në pronësi të Evis Berberi. GJKKO zbuti masën e sigurisë nga arrest në burg në arrest në shtëpi për Lamin më 14 qershor.
‘Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më 25.07.2024, shpalli vendimin mbi çështjen penale nr. 160 akti, datë 17.07.2024 regjistrimi, mbi ankimin e Prokurorisë së Posaçme kundër Korrupsionit dhe Krimit të Organizuar, me objekt: “Ankim ndaj vendimit nr. 312, datë 13.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar”, ndaj shtetasit nën hetim E.L., disponuar në lëndë të masave të sigurimit personal, dhe vendosi:
Ndryshimin e vendimit nr. 312, datë 13.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar në pikën e disponimit për zëvendësimin e masës së sigurimit personal si më poshtë: Vazhdimin e masës së sigurimit personal me karakter shtrëngues “arrest në burg” parashikuar nga neni 238 i K.Pr.Penale, e caktuar me vendimin nr. 21, datë 13.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar, ndaj personit nën hetim E.L.’- njofton Apeli i GJKKO-së.
