Kreu i Partisë Demokratike, Lulzim Basha ka takuar në selinë e PD sekretarët dhe kryetarët e degëve të demokratëve.
Mësohet se në mbledhjen e ditës së sotme është duke u bërë analiza e zgjedhjeve të 25 prillit. Ndër të tjera në takim pritet të diskutohet edhe për zërat kritikë ndaj kreut të PD pas humbjes në zgjedhje.
Kujtojmë që një sërë emrash të njohur të Partisë Demokratike kanë kërkuar dorëheqjen e Lulzim Bashës pas rezultatit zhgënjyes të 25 prillit. Mes tyre ka qenë edhe Fatbardh Kadilli, i cili po ashtu ka shpallur kandidaturën për kryetar të PD. Mes zërave kundër Bashës ka qenë gjithashtu ish-presidenti Bujar Nishani, Arben Imami, Edvin Kulluri etj.
Nga ana tjetër degët e Partisë Demokratike në rrethe kanë deklaruar mbështetjen e tyre për kreun e PD-së. PD e Shkodrës, Kavajës, Krujës etj. kanë qëndruar në një linjë kur kanë thënë se do të mbështesin Bashën deri në rrëzimin e regjimit.
Ndërkohë, vetë Basha reagoi sot pas një heshtjeje të gjatë duke thënë se “beteja do vazhdojë deri në fitore”. Ai nuk pranoi të filste më shumë duke thënë se do të ketë një dalje për mediat kur të jetë momenti i duhur.
Në zgjedhjet e 25 prillit Partia Demokratike arriti të sigurojë vetëm 59 mandate duke u rreshtuar kështu në opozitë të të tretat zgjedhje në radhë.
