Pas përfundimit të mbledhjes me Grupin Parlamentar të PD-së, Lulzim Basha ka dhënë një prononcim për mediat. Kreu i PD-së është ndalur te rritja e çmimit të bukës dhe ushqimeve të tjera . Ai tha se Grupi i PD do të propozojë uljen e TVSH për këto ushqime nga 20% në 10%.
Ai është ndalur te të dhënat që ka studiuar së fundmi INSTAT, sipas të cilit çdo familje shqiptare preket tek gjërat jetike minimale. Basha ka thënë se nuk do të qëndrojnë vetëm në rrafshin e denoncimeve, pavarësisht se sipas tij fajtori dihet kush është.
“E para ku dua të ndalem sot është gjendja me të cilën ballafaqohen shqiptarët sot. Vetëm sot INSTAT ka publikuar të dhënat që çdo prind e prek në tavolinën e bukës dhe kjo është varfëria ekstreme e cila po shërbehet nga rritja galopante e çmimeve. Nisi me bukën por është shtrirë me ushqimet e tjera të shportës, gazit, energjisë, ujit. Ne nuk mund të rrimë në rrafshin e denoncimeve pavarësisht se fajtori dihet, mentaliteti i një grupi që mendon vetëm për ortakët e vet që paratë i çon nga qytetarët tek këto xhepa. Grupi Parlamentar i PD do të depozitojë në kohën më të shkurtës propozimin për të vendosur uljen e TVSH mbi mallrat e shportës nga 20 në 10%. Ky nuk është thjesht një propozim politik. Ky është një hap i domosdoshëm për të ndihmuar njerëzit në nevojë ekstreme. Ky është edhe një veprim politik. E dyta ka të bëjë me faktin se pse jemi ne në parlament. Jemi për kthimin e legjitimitetit dhe demokracisë në vend e cila është agjësuar nga masakra zgjedhore e 25 prillit”- tha Basha.
