Kandidati për kryetar të Partisë Demokratike, Fatbardh Kadilli ka thënë se nëse Basha largohet, partia vetëm shëndoshet. Në emisionin “Real Story”, Kadilli tha se takimi i fundit me Bashën ka qenë një debat civil dhe se ai e dinte që nuk do të ishte në listë. Kadilli ka thënë se ai as nuk donte të ishte pjesë e listës, kur pa listën e koordinatorëve pasi e dinte që nuk do të fitonte.
“Po u largua Basha vetëm shëndoshet partia, nuk shkërmoqet. Nuk keni asnjë shans me Bashën. Gaboni nëse nuk mendoni që s’ka lider tjetër. Basha ka hyrë në një spirale zbritëse. Më 25 prill kam bërë fushatë në të gjithë Shqipërinë. I kërkova Bashës, se do të jem i angazhuar në të gjithë Shqipërinë. Takimi i fundit me Bashën ka qenë një debat civil. Unë e dija që s’do të isha në listë.
Në 2 muajt e fundit as unë nuk doja të isha në listë, kur pashë listën e koordinatorëve thashë që s’do kisha shans që do të fitonim dhe nuk doja sepse s’doja të turpërohesha. Përgjegjësinë që mora e kam kryer shkëlqyeshëm. Debati i fundit ka qenë debat për gjërat parimore dhe çfarë duhet bërë për të rregulluar. Për disa zona kam pasur kontributin tim. Në ato zona rezultati ka qenë pozitiv. Kam qenë i impenjuar me njohjet e mia në parti. Në rezultatin e 4 qarqeve jam krenar që kam kontributin tim konkret”, tha Kadilli.
Më tej ai shtoi se ka zgjedhur këtë aksion sepse beson se mesazhi i tij të pranohet nga kryesia. Siguria e tij vjen prej faktit se anëtarët e partisë janë të shqetësuar. Kadilli tha se po nuk u hap partia, nuk ka shpresë.
“Unë kam zgjedhur këtë aksion duke besuar realisht që të arrijë që mesazhi im të pranohet nga kryesia. Siguria ime vjen nga fakti që anëtarët e partisë janë të shqetësuar.
Ata janë të shqetësuar për fatin e tyre, ata e kanë marrë mesazhin. A do të jem i zoti në kaq kohë të imponoj këtë vizion në shpresë, apo do të mbeten peng në modelin që na duhet një çoban, mbetet për t’u riparë. Anëtarët e partisë janë ata që debatojnë më shumë, ata e kanë lëkurën më të hollë për të ndjerë. Ideja është që janë mësuar nga ky lider dhe e kanë të vështirë të shkëputen nga modeli.
Po s’u hap partia, nuk ka shpresë. Partia duhet të jetë e fortë atje ku është partia. Anëtari i partisë të mos marri leje për vendimmarrje, të jetë i lirë. Nëse unë bëhem kryetar partie, do të bëj votimin primar për kryetarët e partive, njerëzit ta dinë, ai të punojë dhe të jetë në terren. Këto janë idetë e re politike që kam”, deklaroi Kadilli.
