Protesta e sotme e opozitës duket se nuk do të zgjasë aq sa ishte parashikuar.
Në tryezën e bashkëbisedimit me grupet e interesit, kryedemokrati Basha ka dhënë disa detaje rreth aksionit të sotëm, ku ka thënë se protesta nuk do të zgjasë 2 orë ashtu siç është bërë e ditur paraditen e sotme, por 3 orë.
Ndërkohë që thotë se nga ora 18:00 deri në orën 21:00 do të bllokohen 12 akse kryesore të vendit, ka ftuar edhe qytetarët që të bashkohen në këtë mosbindje, pasi sipas tij, përballë dhunës çdo popull evropian kështu vepron.
“Përballje me protesta nuk mund të konsiderohet thjesht si karshillëk, por se nuk kemi asnjë instrument tjetër. Përballë dhunës çdo popull europian vepron si ne. Ne jemi të vendosur të vijojmë me mosbindjen civile, i bëj thirrje qytetarëve të na bashkohen në këtë aksion duke filluar sot në orë 18 deri në orën 21”,- tha Basha.
Mirëpo një fakt shumë i rëndësishëm i përmendur gjatë bashkëbisedimit ka qenë edhe fakti nëse do ketë apo jo negociata. Sipas Basha kjo mbetet një mundësi e hapur, por sigurisht do të ndodhë pasi Rama të jap dorëheqjen nga qeveria dhe të vendoset qeveria tranzitore.
“Si do të shkohet drejt produktit që propozojmë ne? Natyrisht me negociata duke pasur përballë kundërshtarin e PS, duke insistuar për një frymë dialogu në shërbim të interesit kombëtar për të ndalur rënien kokëposhtë drejt një gremine. Por, parakushti për dialog është largimi i kësaj qeverie të kapur në afera korruptive, të kapur në bashkëpunim me kriminelë teksa vjedhin zgjedhjet. Të kërkosh të ulesh me një përdhunues serial dhe t’i besosh procesin e ardhshëm zgjedhor kjo është pabesi, është kriminale. Në vendet e Europës ai do ishte ndjekur penalisht. Ai është edhe përdhunues edhe kujdestar. S’mund të jesh edhe përdhunues serial edhe kujdestar. Kushti ynë paraparak është largimi i Ramës dhe hapja e rrugës drejt një procesi normal dialogu”,- vijoi kryedemokrati.
