Në foltoren e Kuvendit teksa kryeministri Edi Rama po fliste për menaxhimin e situatës së pandemisë së koronavirusit, ku deklaroi se vendi ynë e përballoi me sukses situatën në fjalë, lideri demokrat, Lulzim Basha nuk ka ngurruar për të replikuar kundrejtë fjalëve të kryeministrit Rama.
Basha pohoi disa herë me zë të lartë se janë regjistruar 16 mijë viktima nga koronavirusi në vendin tonë. Ndërkohë që Rama i kthehet me ironi duke thënë se pavarësisht shtytjes që i dhanë akuzat e opozitës, Shqipëria e përballoi me sukses pandeminë. Ndërkohë, kryeparlamentarja Lindita Nikolla herë pas herë ka paralajmëruar liderin demokrat Lulzim Bashën që të mos bëjë ndërhyrje të tilla pa marrë leje më parë.
Rama: Në 2013-ën vetëm 43 përqind e shpenzimeve në shëndetësi mbulohej nga shteti. Kemi kursyer nga buxheti i shtetit. Kemi ndërtuar 300 qendra shëndetësore siç premtuam. Edhe më evident është një Shërbim Kombëtar i Urgjencës Shëndetësore ka vendosur një standard bashkëkohor. Sikur virusi që gjunjëzoi botën të kishte gjetur Shqipërinë me shëndetësinë, me drejtuesit pa kokë të sistemit shëndetësor, siç e gjetëm ne, pa platformën E-Albania, parafytyroni karantinën e përgjithshme pa pasur mundësinë që të dilnin për leje. Këtu do të ishte bërë një gjë më e rëndë. Këtu do të ishte një motiv krenarie. Shqipëria nuk u gjunjëzua në kohën e pandemisë.
Basha: 16 mijë vdekje
Rama: Meqë po ndërhyni, përballoni dhe aleancën tuaj me virusin, i dhatë një shtytje të lehtë, po nejse.
Seanca në Kuvend pritet që të rinisë në orën 13:00, ku qeveria dhe ministrat do të presin pyetje në lidhje me programin e katër viteve të ardhshme.
