Para pak ditësh Ministria e Shëndetësisë dhe Mirëqenies Sociale njoftoi se në vendin tonë nuk do të luhet volejboll për një afat ende të papërcaktuar.
Pas 8 muajsh në pezullim Ministria e Shëndetësisë i ka kthyer përgjigje negative Federatës Shqiptare të Volejbollit e cila kishte bërë kërkesë për rikthimin e aktivitetit pa tifozë dhe sipas protokollit të masave si në të gjitha vendet e rajonit të cilat aktualisht e kanë nisur sezonin.
“Aktivitetet sportive, përfshirë këtu edhe volejbollin, konsiderohen aktivitete me rrezikshmëri të lartë për përhapjen e infeksionit “COVID-19”.Gjithashtu, ju sjellim në vëmendje se grumbullimet masive në vende të mbyllura apo të hapura janë të ndaluara sipas Urdhrit nr. 351, datë 29.05.2020 Për “Marrjen e masave të veçanta dhe kufizimeve për parandalimin e përhapjes së ‘COVID-19’ të ndryshuar.
Kërkesa juaj është shqyrtuar edhe në mbledhjen e Komitetit Teknik të Ekspertëve, i cili duke vlerësuar situatën epidemiologjike në vendin tonë, shtimin e rasteve të reja, vendosi se aktualisht nuk është e mundur hapja e aktivitetit sportiv të volejbollit për shkak të rrezikshmërisë që paraqet në përhapjen e infeksionit ‘COVID-19″, thuhet në përgjigjen e MSH0-së.
Por a nuk duket një situatë paradoksale kjo pasi prej kohësh në vendin tonë janë lejuar gjithçka, duke nisur që nga baret, restorantet, palestrat, transporti urban etj.Dhe thujase të gjitha ekipet prej muajsh stërviten normalisht në palestra, e madje nuk kanë munguar as ndeshjet miqësore. Gjithashtu, nuk kanë qenë të pakta rastet kur palestrat dhe ambientet e mbyllura janë shfrytëzuar për fushata elektorale.
Të njëjtin mendim kanë edhe përfaqësuesit e Federatës së Volejbollit të cilët shpjegojnë edhe njëherë për Ministrinë e Shëndetësisë dhe ekspertët e saj mënyrën sesi zhvillohet loja e volejbollit.
“Ndërkohë që janë hapur e funksionojnë palestrat e “fitness”-it, qendrat tregtare, transporti publik, baret, restorantet, shkollat, kinematë, etj., Ministria e Shëndetsisë e konsideron sportin e volejbollit me rrezikshmëri të lartë në përhapjen e virusit “Covid-19”! Një gjë e tillë vjen teksa ekspertët e mjekësisë dhe shëndetit anembanë botës e kanë ulur nivelin e perceptimit të rrezikut për shumicën e sporteve në përgjithësi dhe volejbollit në veçanti.
Ajo që duhet theksuar është se kjo përgjigje e Ministrisë së Shëndetsisë nuk merr parasysh as faktin se volejbolli ka një veçanti, që ekipet janë të ndarë nga njëri-tjetri dhe lojtaret luajne ne nje fushe 162 m2 e cila ndodhet ne nje hapesire 800 m2 minimumi. Edhe elementet e tjere qe perbejne lojen e volejbollit zhvillohen ne fraksione te sekondit gje qe e ben te pamundur transmetimin e Covid-19″, thuhet në deklaratën e FSHV-së.
Ndërkohë që në vendet e tjera të rajonit në Kosovë, Serbi, Mal të Zi dhe vendet europiane ka filluar sezoni i ri, sporti në Shqipëri dhe veçanërisht volejbolli merr një tjetër goditje të rëndë, që prej 8 muajsh ende nuk kemi parë ndeshje zyrtare nga kampionati i Volejbollit në vendin tonë edhe pse lojtarët janë stërvitur çdo ditë.
Pasi duhet të kujtojmë këtu se edhe klubet e kategorisë Superiore ishin në bojkot deri ditën e djeshme, pasi qeveria tha se do të plotësojë kërkesat e tyre. Por edhe pse u tha diçka e tillë ende nuk kemi parë një vendim zyrtar sesi do të plotësohen këto kërkesa.
