Seanca e sotme parlamentare ka nisur me tensione dhe debate të shumta dhe e gjithë kjo erdhi nga vendimi për të vazhduar mbledhjet e komisioneve online për të shmangur kështu përhapjen e infektimeve apo varinateve të reja të koronavirusit brenda në Kuvend. Shumë deputetë të Partisë Demokratike kanë dalë kundër këtij vendimi pasi sipas tyre po i cënohet e drejta për të shprehur mendimin duke qenë se e konsiderojnë Parlamentin një “arenë debatesh”.
Në lidhje me këtë çështje ka reaguar edhe Sekretari i Përgjithshëm i Partisë Demokratike, Gazment Bardhi i cili është deklaruar kundër vendimit të Konferencës së Kryetarëve për komisione online në Parlament.
Bardhi paralajmëroi se do të mbledhë grupet parlamentare të opozitës për të mbajtur një qëndrim të përbashkët mbi situatën e re të krijuar.
Ai thekson se nuk bëhet fjalë për bojkot, por deputetët opozitarë kanë pranuar sugjerimin për t’u vaksinuar.
Nga ana tjetër Bardhi hedh poshtë kategorikisht që të ketë bashkëpunim në një parlament që funksionon në mënyrë të tillë.
“Vendimmarrja për ti mbyllur gojën opozitës, me seanca qesharake online ka synimin e vetëm për ti ikur përgjegjësisë mbi debatin, diskutimin, aktet korruptive që qeveria sjell në parlament.
Padiskutim që kjo është e papranueshme. Keni raportuar sot, jemi mbledhur 140 deputetë. Para dy ditësh njëlloj si në komisione u mblodh Këshilli i Ministrave.
Qeveria u mblodh fizikisht. Pse do të duhet që komisionet të mos mblidhen sipas kushteve të përcaktuara nga Kuvendi. Fizikisht, dhe jo në mbledhje qesharake.
Unë kam konsultuar tre kryetarët e grupeve parlamentare, do të bëjmë një mbledhje të përbashkët, vendimi është i papranueshëm ka mungesë transparence, ka synim ti fshihet syve të opinionit publik.
PYETJA: Do të bashkëpunoni me mazhorancën? Ftesa e Gjiknurit?
Së pari të përqëndrohemi tek kjo ngajrje e rëndë. Opozitës po i mbyllet goja. Në këtë prizëm nuk besoj që ky është një parlament që funksionon dhe ku secili prej nesh mund të kryejë reforma. Në një parlament ku synohet ti hidhet hi syve të publikut, ti mbyllësh gojën opozitës, nuk mund të flitet për bashkëpunim.
Nuk kam dijeni për deputetët e vaksinuar ose jo. Janë udhëzuar për t’u vaksinuar. Kolegët e kanë pranuar sugjerimin dhe këshillën. Jemi gati ti nënshtrohemi vaksinimit. Më thoni kush është dallimi mes mbledhjeve. E njëjta procedurë dhe e njëjti rregull. MSH i jep leje Ramës për mbledhje, ndërsa e njëjta MSH na thotë mos u mblidhni në komisione parlamentare, mos demaskoni dhe bëni opozitë ndaj akteve korruptive të qeverisë në kundërshtim me Kushtetutën.
Unë nuk fola për bojkot, sikundër nuk e di kush e ka hedhur si ide. Shehu hodhi mendimin e tij, jam konsultuar me kryetarët e grupeve parlamentare të opozitës. Do të mblidhen grupet në mbledhje të përbashkët për vendim.’’- tha Bardhi.
