Nga lamtumira e Lionel Messit tek fusha e lojës. Barcelona duket se nuk e ka ndjerë mungesën e yllit argjentinas dhe ka fituar 3-0 ndaj Juventusit në trofeun e përvitshëm miqësor “Gamper”.
Serinë e golave për katalanasit e hapi blerja e kësaj vere, Memphis Depay. Goli i dytë u shënua në minutën e 57-të, nga Braithwaite, ndërsa Riqui Puig erdhi nga stoli për t’i vënë vulën përfundimtare fitores me golin e tretë.
Sergio Busquets, tashmë kapiten i ekipit, ngriti trofeun, ndërsa heroi i takimit u shpall portieri i Barçës, Neto Murara, i cili fitoi çmimin si “Ylli i ndeshjes” falë pritjeve të tij, që e mbajtën portën të paprekur.
Juventusi nuk arriti të shënonte asnjë gol, edhe pse me Cristiano Ronaldon në fushë për një pjesë të lojës. Këtë herë, Ronaldo u rikthye në “Camp Nou”, por nuk kishte përballë rivalin e tij të përjetshëm, Lionel Messi.
Pak minuta edhe për Rey Manajn, i cili hyri në fushë si zëvendësues në minutën e 78-të.
Ky ishte testi i fundit për të dy ekipet para fillimit të kampionateve javën tjetër. Barcelona e fillon ditën e dielë me një përballje ndaj Real Sociedad, ndërsa Juventus do të përballet me Atalantën në “Allianz Stadium”.
