Rreth 15 familje në lagjen “Ferëm Partizani” në qytetin e Kuçovës jetojnë çdo ditë nën frikën e shembjes së pallatit të tyre pesëkatësh. Ndërtesa, e ndërtuar 45 vite më parë, ka pësuar dëmtime serioze në strukturë, me çarje në kolonat mbajtëse, plasaritje në mure dhe lëvizje të tavaneve që kanë krijuar deformime të dukshme.
Banorët shprehen të alarmuar për gjendjen e rëndë të objektit dhe theksojnë se një tërmet në këtë zonë mund të sillte pasoja fatale. Ata kanë bërë vazhdimisht ankesa në bashkinë e Kuçovës, por sipas tyre, institucionet nuk kanë marrë asnjë masë konkrete për të zgjidhur situatën.
“Na kanë mashtruar vetëm me fjalë, por nuk kanë ndërhyrë për të na ndihmuar,” thonë banorët, të cilët ndihen të braktisur dhe në mëshirë të fatit. Ata kërkojnë ndihmë urgjente për rikonstruksionin e pallatit dhe apeluan për ndërhyrje të menjëhershme nga autoritetet për të shmangur një tragjedi të mundshme.
Përveç rrezikut nga shembja, banorët ankohen edhe për mungesë investimesh në lagje, si ndriçimi publik dhe pastrimi, duke theksuar se pavarësisht këtyre kushteve të vështira, vazhdojnë të jenë taksapagues të rregullt. Ata kërkojnë që institucionet të mbajnë përgjegjësi dhe të ofrojnë zgjidhje konkrete për sigurinë dhe jetesën e tyre.
