Banorët e zonave të Krujës dhe Fushë-Krujës që preken nga aksi Thumanë-Kashar do të mblidhen sërish për të protestuar.
Protesta, e cila do të zhvillohet këtë të martë në orën 18:00 pranë ish-Rreth Rrotullimin Thumanë, është njoftuar nga deputetja e PD-së, Andia Ulliri.
85 mijë banorë të zonës shprehen se ndjehen të izoluar, dhe si për rrjedhojë bizneset e tyre po falimentojnë. Ata kërkojnë akses në autostradën Thumanë-Kashar përmes ndërtimit të hyrje-daljeve të premtuara në projekt, kompensim të drejtë për pronat e shpronësuara, dhe transparencë të plotë mbi procesin që çoi në rritjen dramatike të kostos së projektit.
Më herët, banorët e Bashkisë Krujë iu drejtuan SPAK-ut me një kallëzim për vënien para përgjegjësisë të zv.kryeministres Balluku si dhe Autoritetit Rrugor Shqiptar. Banorët ngrenë akuza për shpërdorim detyre, korrupsion, shkelje e barazisë në tendera dhe falsifikim dokumentesh.
Banorët bëjnë thirrje edhe për transparencë në projektin e autostradës Thumanë- Kashar, kostoja e së cilës u rrit në mënyrë të pashpjegueshme nga 161 milionë në 457 milionë euro.
Kjo protestë është një thirrje për drejtësi, transparencë dhe respektimin e të drejtave themelore të qytetarëve të Bashkisë Krujë, që kanë ngelur të izoluar projekti i autostradës Thumanë-Kashar.
