Në emisionin “Opinion” mbrëmjen e sotme, u theksua se shuma që grabitësit kanë marrë dy ditë më parë në aeroportin e Rinasit është rreth 6.5 milionë euro.
Shifra ka dalë nga burime zyrtare të tre bankave.
Societe General Albania kishte tre autoblinda të shoqërisë së Anakonda, Raiffeisen Bank po ashtu tre autoblinda në shoqërisë Nazeri si dhe Tirana Bank me 3 autoblinda të Oktapus.
Kujtojmë që deri më tani flitej për një shumë prej 10 milionë euro.
Kanë kaluar dy ditë pas grabitjes dhe policia ende nuk ka rënë në gjurmët e autorëve.
Operacioni për gjetjen e tyre është zhvendosur mes Krujës dhe Fushë-Krujës, pasi policia ka dyshime se ata mund të fshihen në këtë zonë.
Kujtojmë që nga kjo ngjarje ka humbur jetën Admir Murataj, por ende nuk kemi një emër nga policia për grabitësit e tjerë.
Murataj, megjithëse në kërkim ndërkombëtar që prej vitit 2013, u konsiderua si truri organizator i 3 grabitjeve spektakolare në Tiranë të më shumë se 5 milionë eurove, por autoritetet dështuan të binin në gjurmët e tij gjatë këtyre 6 viteve.
I hetuar në mungesë, teksa bashkëpunëtorët e tij u dënuan me një shekull burgim, Admir Murataj u vra nga policia rreth 2 km larg aeroportit, ndërsa iu gjetën në trup dy kallëpe dinamiti, një granatë dhe një kallashnikov.
Mendohet që pas largimit nga pista, Murataj ka qëlluar ndaj policisë në përpjekje për të fituar kohë, derisa shokët e tij të braktisnin makinën e krimit.
