Ish presidenti Bamir Topi u paraqit këtë të martë në Prokurorinë e Posaçme, ku u pyet për rreth një orë e gjysmë lidhur me hetimin për ngjarjet e 21 Janarit. Ai është marrë në pyetje në cilësinë e personit që ka dijeni, ndërsa ka dhënë shpjegimet e tij përpara hetuesve të SPAK-ut.
Topi, i cili në vitin 2011 mbante postin e Presidentit të Republikës, kohë kur gjatë protestës së opozitës u vranë nga plumbat e gardës katër qytetarë dhe u plagosën të tjerë, refuzoi të jepte detaje mbi dëshminë e tij. Në dalje të institucionit, ai deklaroi se çështja mbetet në fazë hetimi dhe nuk mund të zbulojë më shumë.
“Kisha një thirrje nga SPAK për çështjen e 21 janarit, për të dëshmuar atë çfarë di unë. Kam qenë në atë kohë kryetar shteti, unë kam folur vazhdimisht për 21 janarin. Duke dalë nga ky institucion, meqë është në proces hetimi, mjafton t’iu them vetëm kaq. Dihet funksioni i SPAK, është hetimi për të dalë tek e vërteta. Në respekt të institucionit, më lejoni ta mbyll këtu. Gjithçka është në fazë hetimi. Kam folur pafund”, u shpreh ai.
Edhe në një deklaratë të mëvonshme për mediat, ish presidenti kërkoi mirëkuptimin e gazetarëve për të mos dhënë informacione të tjera, duke e cilësuar procedurën si pjesë të sekretit hetimor.
“Kam qenë në atë kohë kryetar shteti. Kam folur vazhdimisht për 21 janarin në respekt të transparencës ndaj publikut. Por duke qenë se është proces nën hetim, nuk them dot më shumë se kaq. SPAK heton për të dalë tek e vërteta”, deklaroi Topi.
Hetimet për krimin shtetëror të 21 Janarit nisën në korrik të vitit të kaluar, pas regjistrimit të procedimit për veprat penale të vrasjes në rrethana cilësuese, të kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, shpërdorim detyre dhe pengim të drejtësisë.
Deri më tani, për këtë dosje janë marrë në pyetje ish ministri i Brendshëm Lulzim Basha dhe ish kryeministri Sali Berisha, të cilët konsiderohen figurat kryesore në hetimin e ngjarjeve të asaj dite.
