Belinda Balluku, ministrja e Infrastrukturës dhe Energjetikës në fjalën që mbajti në foltoren e Kuvendit ka lajmëruar se puna për ndërtimin e aeroportit të Vlorës, që sipas saj do të jetë më i madhi në vend. Ndër të tjera ajo ka shtuar se ky aeroport do të përmbushë një ëndërr tjetër të shqiptarëve, atë të udhëtimeve sipas saj me vendet që janë ën distanca shumë të largëta dhe që nga Shqipëria mund të realizoheshin vetëm me tranzit.
Balluku thotë se qytetarët shqiptarë nuk do të kenë nevojë të ndalojnë në një vend tjetër gjatë udhëtimit drejt SHBA-ve.
“Përgjegjësia dhe detyrimi ndaj qytetarëve në këtë moment është më shumë se kurdoherë tjetër, sepse vitet fundit janë shenjuar nga fatkeqësi natyrore dhe sfida të shumta. Dëgjova sot se fatkeqësitë na i paska dërguar Zoti që të tregojë fytyrën e vërtetë të Edi Ramës. Megjithatë, ne vazhduam punën kudo ku ishte e mundur. Tashmë shpresojmë të jemi në fundin e kësaj pandemie.
Aeroporti i Vlorës tashmë është një realitet. Po hidhen hapat e parë për ndërtimin e kantierit, të aeroportit më të madh në vend që do të përfundojë për 36 muaj, që do të përmbushë një ëndërr tjetër të shqiptarëve, atë të fluturimit drejt vendeve të largëta. Kështu, qytetarët shqiptarë do të kenë mundësi të udhëtojnë drejt SHBA-ve pa patur nevojë të ndalojnë në një tjetër vend”, tha Balluku.
