Kreu i Grupit Parlamentar të Partisë Socialiste, Taulant Balla, në takimin elektoral në Mengel të Elbasanit, reagoi me kritika ndaj Partisë Demokratike.
Sipas tij, kjo forcë politike nuk mund t’i sjellë asnjë ndryshim vendit. Balla deklaroi se forca e Partisë Socialiste qëndron te njerëzit, tek ata qytetarë që i kanë besuar kësaj force politike të ardhmen e tyre.
Gjithashtu, kreu i Grupit Parlamentar të PS-së, deklaroi se vota për kryeministrin në 25 prill, do t’i japë atij mundësinë që të bëjë në Mengel të njëjtën punë që sipas Ballës, ka bërë në çdo cep të Shqipërisë.
“Ne kemi punuar fort për të krijuar këtë besim, por kemi ende për të bërë sepse sfidat dhe angazhimet tona s’mund t’i lëmë përgjysmë. Çfarë mund t’i japë më gjithë Shqipëria Sali Berishës dhe Ilir Metës. Vota e 25 prilli është për t’i dhënë mundësinë Edi Ramës që atë çfarë ka bërë në çdo cep të Shqipërisë, ta bëjë edhe në Mengel të Elbasanit”, u shpreh Balla.
Fushata elektorale në Shqipëria ka nisur prej 2 javësh tashmë dhe kur kanë mbetur vetëm dy javë të tjera nga 25 prilli, kjo fushatë duket edhe më e ndezur. Me datë 25 prill, shqiptarët do të kenë mundësinë që në kutitë e votimit, të zgjedhin midis Partisë Socialiste, dhe aleancës opozitare, PD-LSI.
