Partitë kanë filluar që të organizojnë takime me strukturat e tyre nëpër qytete dhe këtë gjë ka bërë edhe PS-ja.
Ditën e sotme Kryetari i Grupit Taulant Balla, ministri Blendi Klosi, deputetët Evis Kushi dhe Anastas Angjeli kanë zhvilluar një takim të gjatë me Asamblenë e Zgjeruar të Partisë Socialiste Peqin.
Nuk mund të mungonte në asnjë mënyrë edhe komenti rreth veprimeve që opozita është duke bërë duke thënë se Basha krijoi një precedent të rrezikshëm, që nuk ka ndodhur në asnjë vend të botës, që çdo opozitë që nuk kënaqet me rezultatin zgjedhor të kërcënojë me djegie mandatesh nëse nuk merr fitoren ne tavolinë.
“Shqipëria nuk e ka luksin që të dalë kundër SHBA dhe BE. Deklaratat e partnerëve tanë ndërkombëtarë nuk lënë asnjë vend për pikëpyetje. Thirrja e tyre mbetet e qartë ndaj çdo kandidati në listat shumë emërore për të mos iu bindur urdhrit politik të Bashës dhe Kryemadhit për mandatet e deputetëve.
Parlamenti është legjitim, Qeveria është legjitime dhe të jetë e qartë se Zgjedhjet e ardhshme të përgjithshme janë në Qershor 2021. Ndërkohë që më 30 Qershor 2019 shqiptarët do të votojnë për kryetarët dhe këshillat bashkiakë”, ka thënë Balla në fjalën e tij.
