Në një debat të ashpër në Kuvend mbi një projekt rezolutë për luftën kundër korrupsionit, Ministri i Brendshëm Taulant Balla ka bërë thirrje për një angazhim më të madh në këtë fushë, duke e cilësuar si kritike për procesin e anëtarësimit të Shqipërisë në Bashkimin Evropian. Në fjalën e tij, Balla ka theksuar se koha ka ardhur për të intensifikuar përpjekjet dhe për të mbyllur epokën e pandëshkueshmërisë. Kujtojmë se teksa Balla bën këto deklarata, ai ka qenë i akuzuar nga opozita si i implikuar në disa dosje kriminale, si ajo e Toyota Yaris, apo përfshirje me bandat kriminale.
“Jemi në një moment të rëndësishëm në luftën kundër krimit, dhe rezultatet që kemi arritur deri më tani janë vetëm fillimi i një revanshi të nevojshëm,” u shpreh Balla. “Duhet të thellojmë këtë revansh të nisur dhe të ndajmë ndërgjegjësinë se kjo na shërben si vlerë e shtuar në rrugën tonë drejt BE-së.”
Ministri ka vënë në pah edhe sfidat nga ata që kundërshtojnë reformat, duke iu referuar disa deputetëve të opozitës që, sipas tij, mbështesin figura të cënuara nga akuzat për korrupsion. “Teksa ne diskutojmë për projekt rezoluta dhe luftën kundër krimit, disa valëvisin fotografi të një personi të shpallur non grata nga SHBA, një person që është sot nën akuzë zyrtare për korrupsion,” shtoi ai.
Balla ka përfunduar fjalën e tij me një thirrje për vendosmëri: “Duhet të theksojmë se ka ardhur fundi i pandëshkueshmërisë. Kjo është e domosdoshme jo vetëm për të forcuar shtetin tonë por edhe për të garantuar një të ardhme më të sigurt për qytetarët tanë.”
Debati vazhdon të jehojë në sallën e Kuvendit, ku pritet të merren vendime të rëndësishme për të ardhmen e luftës kundër korrupsionit në Shqipëri.
