Vangjush Dako padyshim ka qenë një nga emrat më të përfolur, sidomos javëve të fundit për shkak të përgjimeve që janë bërë publike së fundmi, ku emri i Dakos është përmendur për blerje votash.
Megjithatë mesa duket, PS-ja nuk ndan të njëjtin mendim. I ftuar në “Dritare me Rudinën”, kreu i Grupit Parlamentar të PS-së, Taulant Balla ka folur për kryebashkiakun e Durrësit, ku ka thënë se ka bërë një punë të shkëlqyer këto 16 vite që ka qenë në detyrë dhe e meriton që të rizgjidhet.
Megjithatë, Balla ka thënë se këtë e vendos vetëm asambleja e PS-së dhe askush tjetër, por gjithsesi mendimi i tij ishte ky.
Por nuk kanë munguar edhe replikat. Balla ka qenë i vendosur para një paneli gazetarësh të cilët i kanë përmendur blerjen e votave dhe nga ky kreu i Grupit Parlamentar të PS-së i ka kundërshtuar, e për më tepër ka deklaruar se, partia që ai përfaqëson është duke kërkuar që të marrë edhe Bashkinë e Shkodrës edhe të Kukësit.
Pjesë nga intervista e Taulant Ballës
Rudina Xhunga: Ju çfarë do bëni zoti Balla?
Taulant Balla: Kuvendi dhe qeverisja do vazhdojnë punën normalisht. Jemi në proces përmbyllës të kandidatëve për 61 bashkitë.
Andi Tela: Me kë do konkurrojnë?
Taulant Balla: Do konkurrojmë me çdo parti që do marrë pjesë.
Andi Tela: S’ka parti? Thatë që nuk do i digjnin mandatet por i dogjën.
Taulant Balla: Uroj të mos dëgjojnë ty. Se në përgjithësi dëgjojnë Shkullakun. Partitë janë krijuar si instrument për të shkuar në zgjedhje.
Elementë të tillë ndodhin shpesh. Si dje në Rumani, në fundjavë në Francë, apo në Greqi. Nëse atje udhëhiqen nga një ekstrem…
Andi Tela: Elbasani qeveriset shumë mirë, Durrësi qeveriset jashtëzakonisht mirë..
Taulant Balla: Po-po, këto janë konceptet tuaja. Ju ftoj të vini në Elbasan.
Andi Tela: Ju doni t’i komandoni të gjitha?
Taulant Balla: Me organizimin që ka PS me lidershipin që ka PS, me programin që ka PS ne konkurrojmë. më vjen keq që në 2015 kemi humbur me vetëm pak vota në Bajram Curri. Por po ju them…
Andi Tela: Keni bërë reformën territoriale siç keni dashur dhe rezultati vjen siç e doni.
Taulant Balla: Unë po ju thosha se kemi marrë 46% të votave në Bajram Curri në 2017. Bashkia Tropojë nuk ka ndryshuar.
Andi Tela: Për gabimin e PD që ju la ta votoni vetëm reformën territoriale e vuan në kurrizin e saj por nuk është mirë që ju të qeverisni 61 bashki sikur në këtë vend shkon çdo gjë mirë?
Taulant Balla: Ne duam që dhe Kukësin dhe Shkodrën t’i qeverisim ne.
Erl Murati: Do ta rikandidoni Dakon?
Taulant Balla: Vangjush Dako ka bërë një punë të shkëlqyer në këto vite. Ne nuk kemi deklaruar zyrtarisht rikandidimin për asnjë kandidat. Është një gjë që i takon asamblesë. Në 23 mars do të them dhe kandidatët për të gjitha bashkitë e vendit.
Rudina Xhunga: Nuk doni të rikandidoni bashkinë e Durrësit, Elbasanit?
Taulant Balla: Ju niseni nga emrat ne nisemi nga parimet. Ajo që është diskutuar sot është një lexim që KQZ i ka bërë kodit për sa i përket referencës për numrat, për mandatet.
Unë kam një lexim që referenca në ligj i referohet tre mandateve. KQZ ka bërë këtë lexim sot, por përsëri insistoj që Vangjush Dako ka bërë një punë që meriton të rizgjidhet. Megjithatë kjo është një vendimmarrje që i takon Asamblesë së PS.
