Deputeti i zgjedhur i Partisë Demokratike, Luan Baçi ka dalë në një deklaratë për mediat nga vendgrumbullimi i mbetjeve në qytetin e Fierit. Baçi e ka konsideruar alarmante situatën në këtë qytet, ku flakët ende vazhdojnë të jenë aktive. Ai është shprehur se situata në këtë zonë ka dalë jashtë kontrolli.
“Situata është e dukshme tashmë, një situatë vërtet alarmante, e rrezikshme dhe shumë dëmtuese për qytetarët e Fierit. Janë ditë të tëra që qyteti i Fierit është në gjendje katastrofike, tym dhe blozë në çdo shtëpi. Qytetarët janë mbyllur brenda. Nuk është situatë për të bërë politikë dhe unë jam plotësisht dakord me këtë madje më vjen keq që çdokush mundet të thotë që po bëjmë politikë me këtë fatkeqësi. Kemi ditë që e ndjekim situatën nga afër, e kemi denoncuar duke ofruar edhe ndihmesën tonë se si mund të zgjidhet. Ka disa ditë që bëhet sikur punohet. Janë me dhjetëra raste që këtu ka pasur zjarre. Kjo e kësaj here ishte jashtë çdolloj parashikimi dhe ndodh në një situatë që incerneratori korruptiv i Fierit që PD e ka denoncuar ata kanë deklaruar se ata janë gati për të filluar punën që në 25 maj. Duhet të ishin marrë masa për ta pastruar dhe zhbllokuar. Nuk mendoj se do të marrë zgjidhje me 2 mjete që kanë sjellë këtu”- u shpreh deputeti.
Baçi iu ka bërë thirrje qytetarëve që të dalin të protestojnë. Ndër të tjera ai i ka bërë thirrje SPAK që të nisë hetimet për incerneratorin e Fierit, pasi sipas tij dikush duhet të mbajë përgjegjësi për situatën alarmante.
U bëj thirrje qytetarëve të Fierit të protestojnë pasi këtu ka erë korrupsion, situatë e lënë pas dore pasi këta janë të babëzitur. Incerneratori i Fierit është një incernerator jo me teknologjinë që duhet dhe nuk mund të vihet në punë. Banorët e zonave janë duke u larguar pasi nuk u shiten produktet nga tymi. I bëj thirrje SPAK menjëherë të nisë hetimet. Kush mban përgjegjësi për 4 ditë rresht tym dhe dëm për qytetarët. Janë qytetarët që duhet të reagojnë pasi kjo papastërsi bie mbi kokat e të majtëve dhe të djathtëve”- u shpreh ai.
