Ditën e sotme është zhvilluar seanca e radhës për çështjen “Babale”.
Avokati i gazetarit Jetmir Olldashi, i cili është marrë si i pandehur, ka publikuar disa përgjime të Fredi Alizotit, shkruan “Faxweb”.
Ky i fundit akuzohet për kallëzim të rremë dhe dyshohet se ka imituar zërin e Agron Xhafajt, në përgjimin fillestar.
Në përgjimet e publikuara prej avokatit të Olldashit, ka një tentativë prej 10 herësh të Alizotit, për të komunikuar me numrin 0682055399, i cili i përket kreut të Grupit Parlamentar të PS-së, Taulant Ballës.
Ky fakt ka nxehur Alizotin, i cili pasi kërkoi fjalën, tha se shumicën e bisedave e ka pasur me shoqëruesin e Sali Berishës, Sali Lushajn.
“Gjyqtar thuaji të hapë të gjitha telefonatat sepse ka edhe biseda me shoqëruesin e Sali Berishës”, u shpreh Alizoti.
Më tej avokati i Olldashit ka vijuar duke thënë se Alizoti ka tentuar ta takojë edhe nga afër Ballën.
Dosja “Babale”, shkaktoi shumë trazira në politikën shqiptare.
Fillimisht çoi në vetëdorëzimin e Agron Xhafajt te drejtësia italiane, ndërsa pak kohë më pas, ministri i Brendshëm, Fatmir Xhafaj dha dorëheqjen.
Çështja është në dorë të Gjykatës së Tiranës dhe të pandehurit janë, gazetari Jetmir Olldashi, Alberit Veliu i njohur si “Babalja”, Fredi Alizoti dhe ish-deputeti demokrat, Ervin Salianji.
