Avokatura e Shtetit ka deklaruar se mediat në pronësi të Irfan Hysenbelliut, përfshirë News24, BalkanWeb, Panorama dhe Gazeta Shqiptare, kanë mbajtur prej më shumë se tre vitesh ambiente shtetërore në ish-Uzinën e Pjesëve të Këmbimit të Automjeteve, pa titull ligjor, pas përfundimit të kontratës së qirasë.
Sipas Avokaturës, kontrata ka përfunduar më 22 maj 2022 dhe Ministria e Financave e ka njoftuar zyrtarisht subjektin të lirojë ambientet deri më 25 korrik 2022. Megjithatë, kompania nuk i ka dorëzuar vullnetarisht dhe ka vijuar t’i mbajë në kundërshtim me ligjin, duke hapur procese gjyqësore dhe kërkuar masa sigurie për të penguar ekzekutimin.
Çështja është shqyrtuar në të gjitha shkallët e gjyqësorit dhe më 14 korrik 2025, Gjykata e Apelit Administrativ ka vendosur lirimin e menjëhershëm të ambienteve. Në vendim theksohet se aktiviteti mediatik nuk cenohet, pasi ambientet e punës mund të sigurohen në hapësira të tjera.
Me vendim të Këshillit të Ministrave, prona i është kaluar shoqërisë shtetërore “KAYO” sh.a. për bashkëprodhimin e mjeteve motorike, si pjesë e një projekti strategjik për rivitalizimin e industrisë ushtarake dhe krijimin e vendeve të punës në zonën e Shkozës.
Pas rrëzimit të të gjitha pretendimeve të palës private, kanë nisur procedurat ligjore për marrjen në posedim faktik të pronës. Avokatura e Shtetit thekson se do të ndjekë çdo mjet ligjor për ekzekutimin e vendimit dhe mbrojtjen e pasurive shtetërore.
Ndërkohë, në orët e para të mëngjesit, Policia e Shtetit ka rrethuar godinën ku ndodhen redaksitë e News24, BalkanWeb, Panorama dhe Gazeta Shqiptare, duke ndaluar hyrjen e gazetarëve dhe duke kërkuar lirimin e ambienteve.
