Harun Çelik, i cilësuar si gylinist, qëndroi 6 muaj në burg në vendin tonë.
Kjo sepse ai u kap teksa tentonte të ikte në mënyrë të paligjshme në Kanada.
Me mbarimin e dënimit, Turqia kërkoi ekstradimin e tij, pasi Çelik akuzohet të ketë qenë pjesë e grushtiti politik ndaj Erdoganit.
24 orët e fundit ky vendim është shoqëruar me debate të shumta.
Fakti që Shqipëria lejoi ekstradimin e tij, ndonëse Çelik kishte kërkuar azil politik ngjalli dyshime për një pjesë të audiencës.
Së fundmi, avokati i Çelik, Alban Bengasi, ka folur rreth kësaj çështjeje në një intervistë për VOA.
Ai tha se Shqipëria kishte refuzuar kërkesën e klientit të tij për azil politik.
Për më tepër ai shtoi se janë bërë veprime të jashtëligjshme rreth ekstradimit të tij në Turqi.
“Për një akt dëbimi, që ndërmerret ndaj një shtetasi të huaj, jepet një urdhër dëbimi. Ky urdhër shoqërohet me një afat për t’u larguar nga territori i Republikës së Shqipërisë. Më pas personi mund ta kundërshtojë këtë akt në gjykatën administrative, ndaj është gjykata që e vendos nëse urdhëri është i ligjshëm apo i paligjshëm” – tha avokati Alban Bengasi.
Ditën e sotme Shërbimi Informativ Kombëtar Turk (MIT) u përfshi në procesin e deportimit të Çelik nga Shqipëria.
