Kompania ajrore Wizz Air po vazhdon refrenin, pavarësisht denoncimeve të panumërta. Në një incident të fundit, fluturimi i datës 4 shtator Tiranë-Milan Bergamo, u shty për më shumë se 7 orë.
Fluturimi ishte përcaktuar të nisej në 17:00, por pa dhënë asnjë shpjegim, kompania e shtyu për në orën 00:45 të datës 5 shtator.
Pasagjerët, përfshirë të moshuar, gra dhe fëmijë, u detyruan të prisnin për orë të tëra pa shpjegime. Një qytetar e përshkroi situatën si “tallje e hapur me njerëzit”.
Një rast tjetër ndodhi më 17 korrik në fluturimin Xhenova-Tiranë. Një pasagjere filmoi kaosin e shkaktuar nga mbishitja e biletave dhe ja dërgoi mediave për publikim.
“Pasi pritëm një orë para se të hipnim në avion, kur hipëm kompania kishte bërë ‘over booking’, pra kishin dy vende plus. Kështu që na lanë të presim një orë e gjysmë sipër avionit për të zbritur dy pasagjerët që ishin plus.”
Mirëpo, qytetarja tregon se u shantazhua nga personeli i avionit pasi videoja bëri xhiron e rrjetit, duke e kërcënuar me Polici për denoncimin për mos-korrektesën e Wizz Air.
Rrahman Kasa, kryetar i Unionit Turistik Shqiptar, shpjegoi detyrimin e kompanisë për dëmshpërblim, kur vonesat janë mbi 3 orë, ose ka anulime fluturimesh.
“Filmimi në aeroporte dhe avionë nuk është i ndaluar. Pasagjerët e kërcënuar mund t’i drejtohen gjykatës. Madje ka shtete të BE, që për të tilla raste, kur bëhet fjalë për kërcënime të qytetarit të kësaj natyre, kanë avokat falas.”- u shpreh ai.
