Atentati para zgjedhjeve: Kur krimi dikton emërimet në Polici, guxon t’i sakrifikojë Rama votat e kriminelëve?
Një atentat i dyfishtë dhe i paralajmëruar në Shkodër la pas viktima të pafajshme dhe plagë të rënda, duke shtruar pyetje të ashpra për policinë dhe drejtuesit e saj. Tensioni është i lartë, ndërsa vendi i përgatitet për zgjedhjet e ardhshme, me ndërhyrjen e bandave kriminale që përflaken në të gjithë skenën.
Hamza Lici dhe Arlind Bushati u zunë pritë në Shkodër, nga autorë ende të paidentifikuar. Ndërsa Hamza Lici humbi jetën në vend, vetëm pak më parë u raportua se ka ndërruar jetë në spital edhe Arlind Bushati, djali i ish-kandidatit të Partisë Demokratike për kryebashkiak të Shkodrës, Xhemal Bushati.
Në këtë masakër në mes të vendit humbi jetën dhe një kalimtare e pafajshme, Flutura Basha, e cila po udhëtonte me bashkëshortin, Bashkim Basha, kur makina e Licit humbi kontrollin përplasi motorin e tyre. Bashkim Basha u plagos dhe ndodhet në gjendje të rëndë në spital.
Atentati dyshohet të jetë kryer nga grupi kriminal i Bajrajve, të cilët prej vitesh kanë konflikt të hapur me familjen Lici.
Një krim i paralajmëruar
Kjo ngjarje tragjike ishte e paralajmëruar. Vetë Arlind Bushati kishte kërkuar pak javë më parë ndihmë nga policia, duke deklaruar hapur se i kërcënohej jeta. Ai kishte raportuar se persona të paidentifikuar i kishin drejtuar armën në një zonë publike të pedonales së Shkodrës.
Sidoqoftë, asgjë masë nuk u mor për parandalimin e krimit.
Indiferenca e Drejtorit të Policisë së Shkodrës, Edmond Sulës, që prej momentit të denoncimit deri në mbrëmjen e atentatit, ka provuar akuzat e Gazment Bardhit, që e implikonin drejtorin me bandat kriminale. Sipas bisedave të zbuluara në SkyECC, Sula ishte emëruar me urdhër të bandave kriminale.
Policia si vegël e krimit
Tragjedia e sotme në Shkodër është një dëshmi e hidhur e dështimit të shtetit në mbrojtjen e jetës së qytetarëve të tij. Në vend që ta luftonte krimin, Policia e Shtetit u shndërrua në mbrojtëse të tij, në një vegël në dorën e pushtetarëve. Pasojat sot janë një bilanc tragjik me viktima të pafajshme si Flutura Basha, e cila pagoi me jetën e saj për indiferencën e drejtuesve të policisë.
A do t’i sakrifikojë Rama votat e krimineleve?
Ngjarja e sotme në Shkodër ndodh pikërisht në prag zgjedhjesh dhe “luftë votash”. A do të zgjedhë Kryeministri të sakrifikojë kësaj here votat e kriminelëve, bashkë me Edmond Sulën?
Do të veprojë kundër tyre dhe të zbatojë ligjin, apo do të vazhdojë të mbajë drejtues si Sula në krye të policisë, për të mbajtur të qeta bandat dhe për të ruajtur votat e tyre?
Në Shkodër, qeveria dhe krimi duken të ndërlidhura me njëra-tjetrën, duke ndarë poste dhe përfitime.
A do të sakrifikohet e ardhmja e një qyteti për votat e të inkriminuarve?
Kur krimi dikton emërimet në polici e deputetët në lista dhe kur drejtësia është vegël në dorën e politikanëve, kujt mund t’ja besojmë jetën?
/gazetareforma.com
