Detaje të reja kanë dalë sot në dritë në lidhje me atentatin e ndodhur mbrëmjen e djeshme në Fushë Dukat, në afërsi të Orikumit, në Vlorë.
Kur kanë kaluar rreth 12 orë nga ekzekutimi i 27-vjeçarit Benjamin Bezhanaj (Bezhani), në Vlorë, ende nuk ka asnjë të ndaluar si të dyshuar kryesor për ngjarjen e rëndë, që rikthen edhe njëherë tjetër frikën nga krimi në qytetin bregdetar.
Policia ndodhet ende në vendin e ngjarjes në fshatin Dukat, duke kryer kontrolle në të gjithë rrugicat e fshatit, ndërsa ka zgjeruar dhe perimetrin e sigurisë, në vendin ku u vra me 8 plumba Bezhanaj.
Referuar burimeve policore, mësohet se autorët i zunë pritë të riut dhe ishin të sigurt që do të kalonte në këtë rrugë. Ata madje ishin fshehur pas pemëve për të vënë në zbatim planin e tyre.
Në drejtim të mjetit të Benjamin Bezhanit janë derdhur 15 plumba kallashnikovi, ndërsa 8 prej tyre e kanë goditur në trup duke i shkaktuar vdekjen e menjëhershme.
Nga sa mësohet, i riu kishte ndërruar jetë në momentin që një banor i zonës e pikasi brenda makinës së tij.
Sa i takon zonës ku ka ndodhur ngjarja, ajo është e pandriçuar mirë, dhe nuk bëhet fjalë që të ketë kamera sigurie në afërsi, ç’ka mund ta bëjë më të vështirë identifikimin e autorëve, të cilët janë larguar të pa shqetësuar nga vendi i krimit.
Banorët e fshatit shprehen me superlativa për të riun dhe familjen e tij, duke thënë se ata nuk dinin që ai të kishte ndonjë sherr apo problem.
Deri tani policia ka shoqëruar 7 persona të dyshuar për ngjarjen, ndërsa ende nuk dihet cilët janë autorët. Pista kryesore e hetimeve mbetet ajo e larjes së hesapeve për pazare droge, duke u nisur edhe nga fakti që i riu kishte bërë burg në Itali për trafik të lëndëve narkotike.
/GazetaReforma.com/
