Hetimet për ekzekutimin mafioz të Gilmando Danit pranë aeroportit të Rinasit po thellohen, ndërsa Policia e Tiranës ka kërkuar zyrtarisht ndihmë nga autoritetet spanjolle për të zbuluar lëvizjet dhe kontaktet e tij gjatë qëndrimit në Barcelona, ku ndodhej së bashku me Muçi Shaljanin, punonjësin e Agjencisë së Mbikëqyrjes Policore (AMP).
Burime nga grupi hetimor bëjnë me dije se kërkesa drejtuar Spanjës synon të verifikojë personat me të cilët Dani dhe Shaljani kanë pasur komunikime apo takime gjatë 4 ditëve të qëndrimit në Barcelonë, për të përcaktuar nëse ndonjë informacion për lëvizjet e tyre është rrjedhur drejt autorëve të atentatit. Deri më tani, nuk ka ardhur përgjigje zyrtare nga autoritetet spanjolle.
Në Shqipëri, forcat policore po kryejnë kontrolle intensive në Tiranë, Kamëz, Nikël dhe Fushë-Krujë, duke u përqendruar kryesisht në godina të braktisura dhe ambiente periferike, ku dyshohet se autorët mund të kenë gjetur strehë pas ngjarjes. Edhe pse janë shoqëruar 15 persona, ende nuk ka asnjë të arrestuar apo të dyshuar konkret për vrasjen.
Sipas ekspertizës mjeko-ligjore të kryer në Morgun e Tiranës, Gilmando Dani ka marrë 20 plumba në trup, ndërsa në vendngjarje janë gjetur mbi 80 gëzhoja. Kjo tregon se atentati është kryer me një breshëri të qëlluar në mënyrë profesionale dhe me synim eliminimin e menjëhershëm të viktimës.
Nga ana tjetër, Muçi Shaljani ka marrë 10 plumba në trup dhe një në kokë, dhe ndodhet në gjendje kritike, i intubuar në spitalin e Traumës. Për shkak të dëmtimeve të shumta, mjekët kanë refuzuar ndërhyrjen kirurgjikale.
Hetuesit kanë konfirmuar gjithashtu se automjeti i autorëve, një Toyota Yaris me targa greke, rezulton i vjedhur në Greqi më 22 tetor 2023, ndërsa targat e përdorura ishin të mbivendosura në vitin 2024, çka tregon për një përgatitje të kujdesshme të atentatit dhe përfshirjen e një rrjeti të mirëorganizuar kriminal.
Grupi hetimor po punon në disa pista paralele, përfshirë mundësinë e përfshirjes së bashkëpunëtorëve nga jashtë vendit dhe të rrjedhjes së informacionit nga brenda aeroportit, që mund të ketë lehtësuar ndjekjen dhe ekzekutimin e Gilmando Danit vetëm pak minuta pas mbërritjes së tij në Shqipëri.
