Më 17 prill, në Lezhë u shënua një tjetër atentat mafioz, ku mbeti i vrarë Gjovalin Prendi, babai i Roan Brahimit, i njohur ndryshe si Sidorel Prendi. Vetëm një orë më vonë, në zonën e Lundrës në Tiranë, katër të rinj përfshirë dy vëllezër të mitur u plagosën.
Sipas hetimeve paraprake, Policia dyshon se ngjarja në Tiranë është pasojë e një ngatërrese, ku objektivi mund të ketë qenë bashkëshortja e Roan Brahimit, e cila jeton në atë zonë.
Kujtojmë se Brahimi u ekzekutua më 9 maj 2024 në Athinë, në sy të gruas dhe djalit të tij. Ai njihej si kundërshtari i përbetuar i Ervis Martinajt, ish-boss i botës së krimit në Shqipëri, i zhdukur që prej gushtit 2022.
Gazetari Esido Barkaj ka zbardhur disa detaje të përplasjes mes dy grupeve kriminale, e cila nisi disa vite më parë, kur Roan Brahimi kishte një borxh ndaj Brilant Martinajt, kushëri i Ervisit. Më pas, grupi i Brilantit e kapi dhe dhunoi rëndë Brahimin një akt që ky i fundit nuk e fali kurrë.
Pikërisht për këtë konflikt, dyshohet se pas atentatit të trefishtë në Fushë-Krujë më 17 korrik 2022, ku u vra edhe Brilant Martinaj, qëndron Roan Brahimi.
Po ashtu, vrasja e Gentjan Bejtjas në Larushk të Fushë-Krujës një tjetër person i afërt me grupin Martinaj dyshohet se është po vepër e Brahimit.
‘Në Lezhë mbeti i vrarë babi i Roan Brahimit. Roan Brahimi ishte një eksponent i lidhur me botën e krimit, shpesh ka sjellë edhe përplasje mes grupeve të ashpra të zonës. Bandat kriminale që operonin në zonën e Lezhës, Laçit ishin banda të frikshme. Ka pasur përplasje të ashpra me grupin kriminal të Ervis Martinaj. Zanafilla nis para disa vitesh. Dyshohet se Roan Brahimi kishte një shumë borxh ngaj Brilant Martinaj. Ai u kap nga grupi i Brilantitt, u dhunua dhe poshtërua nga disa veprime të pahijshme. Kjo mesa duket nuk është pranuar nga Roan Brahimi.
Në lidhje me atentatin e trefishtë në Fushë Krujë ku mbeti i vrarë edhe Brilant Martinaj dyshohet se fshihej Roan Brahimi për shkak të përplasjeve të ashpra që kanë pasur. Vijon më pas saga kriminale. Është vrasja e Gentjan Bejtjas në Larushk të Fushë Krujës. Bejtja dyshohet se ishte pjesë e grupit të Martinajt dhe dyshohet se pas ekzekutimit të tij fshihet Roan Brahimi. Sa i takon atentatit në Tiranë, për policinë një pistë e fortë mbetet ajo e ngatërimit të shënjestrës. Në zonën e Lundrës jeton edhe e veja e Roan Brahimit. Të katër personat e plagosur nuk kanë të shkuar kriminale dhe nuk kanë pasur probleme të tjera. Megjithatë nuk përjashtohen pistat e tjera.’, tha gazetari.
