Reagon për ndarjen nga jeta e 26-vjeçarit Enea Themollari, një nga motrat Xhovana Nikolli, të cilave ju krye antentat me 15 Korrik. Xhovana Nikolli ka reaguar në rrjetet sociale nëpërmjet një postimi në Instagram ka shprehur ngushëllimet për familjen e 26-vjeçarit.
“Ngushëllime familjes së Eneas. Zoti ju dhëntë forcë të përballoni këtë dhimbje…Ju prehtë shpirti në paqe”,-shprehet Xhovana Nikolli.
26-vjeçari Enea Themollari, i cili u plagos nga shpërthimi i tritolit në banesën e motrave Nikolli në Elbasan, ka ndërruar jetë ditën e sotme në spital. Themollari që prej korrikut ndodhej në gjendje të rëndë në spitalin e Traumës në Tiranë ku po luftonte me vdekjen për shkak të plagëve që kishte marrë në kokë. I riu mbeti aksidentalisht i plagosur nga shpërthimi i një sasie tritoli që u vendos në mesnatën e 14 korrikut në hyrjen e apartamentit të fqinjëve, dy motrat Nikolli që jetonin me qera në lagjen “Haxhias”.
Tritoli ishte vendosur në koridorin e katit të 4-t të pallatit në derën e hyrjes në pronësi të një 59 vjeçari, ku jetonin me qira motrat Nikolli, të cilat akuzuan Nuredin Dumanin si porositës të vendosjes së tritolit. Ndërkohë ngjarja po hetohet nga SPAK, për shkak se personi që kanë akuzuar si porositës të vendosjes së tritolit, Nuredin Dumani është i penduar i drejtësisë dhe është hetuar nga SPAK.
Pas ngjarjes, Alda Nikolli, motra e Xhovana Nikollit, deklaroi në media se me Nuredin Dumanin kishte nisur një romancë në distancë disa kohë më parë. Nga ana tjetër, Xhovana Nikolli njihet për lidhjen e saj me Amarildo Nikollin alias Xhanej i cili u arrestua nga policia rreth një vit më parë, si i dyshuar që ishte porositur për të vrarë dy persona në qytetin e Vlorës.
