FBI-ja ka bërë të ditur se nuk është ende në gjendje të publikojë emrin e personit që dyshohet se qëlloi ish-presidentin Donald Trump. Sipas agjentit special të FBI-së, Kevin Rojek, personi është “identifikuar paraprakisht,” por janë të nevojshme teste të ADN-së dhe biometrike për të konfirmuar përfundimisht identitetin e tij.
“Ne nuk jemi të përgatitur në këtë moment për të bërë të ditur identitetin e sulmuesit të mundshëm. Jemi në proces të konfirmimit. Sapo të marrim konfirmimin, do ta publikojmë zyrtarisht emrin në shtyp,” deklaroi Rojek.
Ai shtoi se “është një çështje për të bërë konfirmime biometrike. Për personin nuk kishte asnjë identifikim. Ne jemi duke parë fotografitë tani. Ne po përpiqemi të analizojmë ADN-në e tij dhe të marrim konfirmimin biometrik.”
FBI-ja gjithashtu nuk mundi të konstatonte menjëherë se çfarë lloj arme zjarri është përdorur dhe sa të shtëna janë shkrepur gjatë incidentit. Hetimet janë në vazhdim dhe FBI-ja po punon për të mbledhur të gjitha provat e nevojshme për të sqaruar ngjarjen.
