Katër ditë pas atentatit tronditës në zonën e Lundrës në Tiranë, ku u plagosën katër persona, mes tyre edhe dy fëmijë, hetimet mbeten ende në një fazë të pasigurt me shumë pyetje pa përgjigje. Autorët e ngjarjes, që goditën me breshëri automatike pa kursyer të miturit, janë ende të paidentifikuar, ndërsa pistat hetimore po shqyrtojnë si mundësinë e një ngatërrese objektivi, ashtu edhe të një konflikti të mundshëm që lidhet me pronarin e “Pelikani Security”.
Sipas të dhënave të policisë, atentatorët ishin të armatosur me dy kallashnikovë dhe udhëtuan me një motor për rreth 8 kilometra nga vendngjarja në Lundër deri në fshatin Fikas. Aty, mes bimësisë, ata braktisën motorin dhe i vunë flakën për të zhdukur gjurmët. Motorri i djegur, i markës Yamaha, i vitit 1998 dhe pa numër shasie, është tashmë në duart e ekspertëve, të cilët po përpiqen të identifikojnë mjetin përmes karakteristikave të tjera që janë dërguar edhe tek policitë partnere jashtë vendit.
Ndërkohë, armët e krimit, dy kallashnikovët e përdorur në atentat, nuk janë gjetur ende. Hetuesit dyshojnë se në ngjarje është përfshirë të paktën edhe një person i tretë, i cili mund të ketë ndihmuar në largimin e autorëve pas djegies së motorit. Kamera sigurie në zonë po analizohen për të zbuluar drejtimin e mëtejshëm të lëvizjes së tyre.
Nga hetimet paraprake është rindërtuar një pjesë e itinerarit të autorëve: ata janë nisur nga fshati Vishnjë, kanë kaluar në Picallë dhe më pas kanë mbërritur në Lundër, ku kanë qëndruar për rreth 5 minuta të fshehur mes bimësisë. Pikërisht aty është shfaqur edhe automjeti tip G-Class, me të cilin udhëtonin dy vëllezërit e mitur Demiraj, shoku i tyre dhe shoferi. Në momentin që mjeti ka hyrë në rrugë, mbi të është hapur zjarr me breshëri nga të dy armët, duke lënë të katërtit të plagosur.
Policia po verifikon të gjitha automjetet e të njëjtit tip me atë që u bë objekt i atentatit, si dhe makinat që kanë qarkulluar në unazën lindore të Tiranës në mbrëmjen e 17 prillit, për të zbuluar lëvizje të dyshimta në zonën rezidenciale të Lundrës. Hetimet vijojnë në terren me intensitet, ndërsa autorët mbeten ende në kërkim.
