Dy ngjarje të rënda kanë ndodhur mbrëmjen e djeshme në vendin tonë.
Bujar Lika, 37-vjec, i njohur edhe me mbiemrin Hasani është cilësuar nga policia si shënjestra e atentatit të mbrëmshëm në Laç, ku humbi jetën edhe një 53-vjecar si dhe u plagos një 21 vjecar.
Mësohet se Bujar Lika ka qenë i përfshirë në vrasjen e 2015 në zonën e Linzës ku në parkingun e një restoranti u ekzekutua me plumb në kokë, Enton Nikaj.
Kjo ka bërë që policia të ngrejë si pistën kryesore të hetimit, një hakmarrje për ngjarjet e së shkuarës.
Pak minuta pas vrasjes së tij në Laç, në kryeqytet pati një shpërthim me lëndë plasëse në biznesin e familjes së Ervin Matës.
Megjithëse nuk ka prova për të faktuar nëse ngjarjet kanë lidhje me njëra-tjetrën, policia po heton më këtë drejtim pasi Mata dhe grupi kriminal me të cilin kishte lidhje viktima Bujar Lika kanë pasur një përplasje të mëparshme në 4 tetor 2018, në zonën e ish-Bllokut ku viktimë mbeti Fabjan Gazha dhe u plagos Ervis Martinaj dhe Eljon ato.
Bujar Lika, pas një beteje ligjore me drejtësinë në 2016, doli i pafajshëm nga gjykata e Apelit.
Lika është i njohur edhe për lidhje të forta miqësore me kreun e një grupi kriminal kryesisht në fushën e lojrave të fatit.
I plagosur nga ngjarja me 3 plumba në këmbë u paraqit ne spital edhe 21 vjecari Kreshnik Tusha, i cili është i vetmi dëshmitar i gjallë në këtë ngjarje dhe dëshmia e tij pritet që të japë të dhëna të vlefshme për grupin hetimor.
Policia ka bërë me dije se ka sekuestruar edhe pamje nga kamerat e sigurisë për të zbuluar dhe autorin ose autorët e ngjarjes.
Policia dyshon se edhe autori i ngjarjes mund të jetë plagosur, pasi në dorën e viktimës Bujar Lika është gjetur një armë zjarri tip pistoletë që ka kryer qitje.
