Në Kinë për herë të parë që nga janari, nuk është shënuar asnjë vdekje për 24 orë.
Sipas të dhënave të Komisionit Kombëtar të Shëndetësisë, në Kinë janë shënuar 32 raste të reja, të gjithë të importuar.
Prej ditësh Kina po i rikthehet normalitetit, duke lehtësuar masat shtrënguese.
Që nga nesër, qytetarët do të largohen nga Wuhani dhe Hubei, nëse janë të pajisur me një kod të gjelbër në celularët e tyre, i cili do të thotë se nuk kanë probleme me shëndetin.
Deri më tani në rang global janë infektuar nga koronavirusi 1.34 milion njerëz, si dhe janë shënuar 74 mijë viktima.
Koronavirusi tashmë po bën kërdinë në Europë, ku vendi më i prekur është Italia, e cila ka kaluar 132 mijë të infektuar, ndërsa numërohen mbi 16 mijë viktima.
Në Spanjë janë shënuar mbi 136 mijë të prekur, ndërsa numri i viktimave ka kaluar 13 mijë.
Anglia ka mbi 51 mijë raste, ku numërohen mbi 5 mijë viktima.
Përsa i përket rajonit, situata më kritike është në Serbi me mbi 2200 të infektuar dhe 58 viktima, më pas ndjek Greqia me 1755 raste dhe 79 viktima.
