Avokatja e Popullit, Erinda Ballanca ka folur në lidhje me prishjen e Teatrit Kombëtar dhe shkeljet që u bënë hapur nga bashkia e Tiranës.
Ballanca është shprehur në “Ora News” se asgje nuk ishte normale, pasi asnjë ndërtim nuk prishet pa u marrë leja për projektin e ri.
Sipas avokates ende nuk ka një fond dhe një projekt të miratuar për teatrin e ri.
Po ashtu Ballanca ka dënuar edhe dhunën e ushtruar nga policia ndaj qytetarëve, të cilët protestuan ndaj shembjes së Teatrit Kombëtar.
Jeta e tyre është vënë në rrezik, sepse siç është shprehur edhe regjisori Budina në shumë intervista, shembja e teatrit nisi kur brenda tij kishte njerëz.
“Asgjë nuk ishte normale, asgjë nuk ishte ashtu sikurse duhet të zbatohej ligji. Është e qartë se asnjë ndërtim nuk prishet pa u marrë leja për projektin e ri.
Parimisht leja për prishjen merret nga një institucion përkatës me projektin e ri. Këshilli Bashkiak, mori një miratim në cilësinë e pronarit pa një leje.
Ende nuk ka një fond dhe një projekt të miratuar për Teatrin e ri. Për çfarë arsyeja duhet të na japin një rrënojë në qendër të qytetit. Pse duhet që kjo bashki dhe qeveri, kur thoshte se nuk ka fonde për qytetarët, tani na dalin se paskan para për ndërtimin e një Teatri të ri.
Do të jetë gjykata ajo që do të vendosë në fund. Është shkelja e të drejtave të njeriut, përderisa kërcënohen të drejtat kulturore dhe përderisa janë kërcënuar jetët e personave që kanë qenë brenda Teatrit”, është shprehur gjatë intervistës Erinda Ballanca.
