Kryeministri Edi Rama, para pak ditësh njoftoi se këtë vit nuk do të kishte shpërblime për nëpunësit e administratës.
Ky ndryshim erdhi për shkak të pasojave që la tërmeti i 26 nëntorit.
Vendimi është publikuar edhe në Fletoren Zyrtare.
Gjithashtu do të anulohen edhe aktivitetet social-kulturore.
Shefi i qeverisë tha disa ditë më parë, se për këtë vit të ri nuk do të ketë darka dhe valle.
Vendimi i Këshillit të Ministrave
VENDIM
Nr. 781, datë 6.12.2019 për një ndryshim në vendimin nr.929, datë 17.11.2010, të këshillit të ministrave, “për krijimin dhe përdorimin e fondit të veçantë”, të ndryshua. Në mbështetje të nenit 100 të Kushtetutës, të nenit 4, të ligjit nr. 10405, datë 23.4.2011, “Për kompetencat për përcaktimin e pagave dhe të shpërblimeve”, dhe të nenit 11, të ligjit nr. 99/2018, “Për buxhetin e vitit 2019”, të ndryshuar, me propozimin e ministrit të Financave dhe Ekonomisë, Këshilli i Ministrave
VENDOSI:
- Pika 9, e vendimit nr. 929, datë 17.11.2010, të Këshillit të Ministrave, të ndryshuar, riformulohet, si më poshtë vijon: “9. Përjashtimisht për vitin 2019, fondi i veçantë i institucioneve qendrore, buxhetore dhe jobuxhetore, institucioneve të vetëqeverisjes vendore, njësive të fondeve speciale, institucioneve publike, të krijuara me ligj të posaçëm, ndërmarrjeve dhe shoqërive tregtare me kapital mbi 50% shtetëror, në varësi të institucioneve qendrore dhe të vetëqeverisjes vendore, nuk do të përdoret për veprimtari social-kulturore dhe shpërblimin e punonjësve.”.
- Ngarkohen institucionet e përmendura në pikën 1 për zbatimin e këtij vendimi.
Ky vendim hyn në fuqi menjëherë dhe botohet në Fletoren Zyrtare.
KRYEMINISTËR
Edi Rama
Kujtojmë këtu se tërmeti i 26 nëntorit la pas 51 viktima dhe qindra të palgosur.
Mijëra persona mbetën pa shtëpi, ndërsa u dëmtuan edhe disa institucione të rëndësishme.
