Kryeministri Edi Rama në një komunikim online të pak orëve më parë, njoftoi, se do të ndalohet lëvizja e këmbësorëve te liqeni artificial i Tiranës dhe në të gjithë parqet rekreative në zonat e blinduar.
Sipas Kryeministrit tani nuk ka më kohë për ndërgjegjësim, pasi qytetarët gjatë këtyre ditëve janë grumbulluar nëpër parqe, si të ishte një ditë normale.
Menjëherë pas komunikimit të Ramës, policia dhe ushtria kanë ngritur postblloqe në hyrjet e liqenit artificial të Tiranës.
Postblloqet do të qëndrojnë deri në një urdhër të dytë të kryeministrit.
Rama tha se javën e ardhshme do të kemi më shumë të infektuar nga koronavirusi, ndërsa beson se me rritjen e temperaturave, forca goditëse e virusit do të bie.
Në vendin tonë aktualisht janë regjistruar 38 të infektuar dhe 1 viktimë nga koronavirusi.
ISHP bëri me dije se dy nga 12 të infektuar që po qëndrojnë te Infektivi janë në terapi intensive.
Qarkullimi i makinave private është ndërprerë deri të dielën në mesnatë, ndërsa përjashtim bëjnë vetëm ato shtetërore dhe të shërbimeve.
