Në Shkodër është arrestuar një 34-vjeçar i identifikuar si Denis Gjini, në kuadër të operacionit antidrogë të koduar “Koordinata”, i cili synon goditjen e kultivimit të kanabisit në territorin e qarkut.
Sipas njoftimit të policisë, në fshatin Gomsiqe, efektivët e Stacionit të Policisë Velipojë kanë zbuluar dhe asgjësuar 130 bimë kanabisi, për të cilat dyshohet se përgjegjës është pikërisht Gjini, i cili u kap në flagrancë dhe u vu në pranga.
Në të njëjtën kohë, shërbimet e Komisariatit të Policisë Vau i Dejës kanë identifikuar dhe shkatërruar 1278 bimë të tjera narkotike në territorin e njësisë administrative Temal, duke çuar numrin total të bimëve të asgjësuara në 1408.
Policia njofton se puna hetimore vijon për të zbuluar dhe arrestuar personat e tjerë të përfshirë në kultivimin e kanabisit. Të gjitha bimët janë asgjësuar me djegie në vendngjarje.
