Kandidati për kryetar të Partisë Demokratike, Agron Shehaj ka folur në një intervistë për “Frontline” në News 24, ku ka shpjeguar arsyet e kandidimit të tij. Shehaj ka thënë se kjo çështje nuk ka të bëjë me ambicien e tij, por me bindjen se është e pamundur të fitohen zgjedhjet nëse nuk bëhet ndryshim.
“Nuk është një çështje që ka të bëjë me ambicien, por me bindjen që unë kam krijuar, që pas zgjedhjeve të 25 prillit, ku ne humbëm, arrita në konkluzionin se është e pamundur të shkojmë drejt fitores në zgjedhjet e ardhshme, nëse nuk ndryshojmë. Krijova bindjen se e vetmja mënyrë për ta bërë këtë është të futem vetë në garë. Dy elementë kanë ndikuar shumë në humbjen e 25 prillit, djegia e mandateve dhe mospjesëmarrja në zgjedhjet locale”, u shpreh Shehaj.
Ai nuk e cilësoi sfidë apo tradhëti ndaj Bashës kandidimin e tij, por bindje se pa ndryshim nuk shkohet në pushtet. Më tej Shehaj tha se nëse nuk ka garë, nuk ka as konkurrencë. Ai u shpreh se nuk ka qejfmbetje me kryetarin e PD, thjesht vepron në bazë të bindjes së tij.
“As sfidë, as tradhti ndaj Bashës, por bindje se nëse PD nuk ka ndryshim, nuk mund të shkojë në pushtet. Në këtë mënyrë, PD e ka të pamundur të mundë Edi Ramën. Nëse nuk ka garë, nuk ka konkurrencë, PD e ka të pamundur të fitojë zgjedhjet e ardhshme. Unë nuk kam asnjë qejfmbetje me kryetarin e PD, thjesht kam një bindje dhe në bazë të saj veproj. Nuk e bëj as për inat, as për tradhti. Jam futur në politikë, sepse mendoj që Shqipëria duhet ndryshuar, i duhet dhënë fund tranzicionit 30-vjecar, dhe për këtë duhet reformuar PD. PO nuk bëmë PD një parti perëndimore, nuk do ta bëjmë dot kurrë Shqipërinë perëndimore”, deklaroi Shehaj.
I pyetur në lidhje me dorëheqjen e Bashës, Shehaj tha si kryetari i PD duhej ta kishte bërë diçka të tillë dhe të mos rikandidonte më.
“Absolutisht që duhet të kishte dhënë dorëheqjen, madje as të mos rikandidonte. Dorëheqja ka kuptim, kur nuk rikandidon më””, tha më tej ai.
