Një 31-vjeçar me shtetësi etiopiane, banues në Mbretërinë e Bashkuar, është arrestuar në flagrancë nga Policia Kufitare e Qafë Botës dhe efektivët e FRONTEX, pasi po udhëhiqte një grup emigrantësh që tentonin të kalonin ilegalisht drejt Greqisë.
Ngjarja ndodhi në orët e para të së dielës në afërsi të piramidës 74 në zonën e Katajetos, një segment i njohur për kalimet e paligjshme në kufirin e gjelbër mes Shqipërisë dhe Greqisë.
Ai dyshohet se kishte marrë përsipër kalimin e tyre jashtë kufijve kundrejt një pagese.
Sipas hetimeve të para, ky nuk është rasti i parë ku Kibrom dyshohet të jetë përfshirë në këtë veprimtari të paligjshme.
Ai lëvizte nga Greqia drejt Shqipërisë përmes pikës kufitare të Kakavijës, kontaktonte paraprakisht me emigrantët dhe më pas përpiqej t’i kalonte në këmbë përmes kufirit të gjelbër.
Në anën tjetër të kufirit, një mjet transporti i priste për t’i çuar më tej brenda territorit grek.
31-vjeçari është arrestuar për veprën penale “Dhënie ndihme për kalim të paligjshëm të kufirit shtetëror”, parashikuar nga neni 298 i Kodit Penal. Ndërkohë, të shtatë emigrantët do të përballen me procedura ligjore dhe më pas do të riatdhesohen.
Autoritetet kufitare kanë shtuar kontrollet në zonat me risk, në kuadër të masave për frenimin e trafikimit të paligjshëm të emigrantëve, me mbështetjen e operativëve të FRONTEX.
