Një 22 vjeçar nga Utah është në paraburgim për vrasjen me armë të aktivistit konservator Charlie Kirk në kampusin e Utah Valley University në Orem. Sipas AP, i ndaluari është identifikuar si Tyler Robinson. Presidenti Donald Trump deklaroi në një intervistë televizive se “me një shkallë të lartë sigurie” i dyshuari është kapur.
Autoritetet kishin publikuar më herët pamje të dyshuarit që zbriste nga çatia e një ndërtese në kampus dhe largohej nga vendi i ngjarjes. Hetuesit kanë gjetur një pushkë bolt-action që dyshohet se është arma e krimit. Reuters raporton se pamjet dhe arma e sekuestruar janë pjesë e provave kryesore.
Trump tha se një person i afërt me të dyshuarin e njohu dhe i tha të atit, i cili më pas e bindi djalin të dorëzohej te autoritetet. Reuters dhe media të tjera amerikane raportojnë për këtë skenar, ndërsa pritet që organet e rendit të japin detaje të plota në një konferencë zyrtare.
Charlie Kirk u qëllua për vdekje me një të shtënë të vetme gjatë një aktiviteti në UVU, ngjarje që guvernatori i Utah e cilësoi “vrasje politike”.
