Një 58-vjeçar, i dënuar me 7 vite burg në Itali për pjesëmarrje në një organizatë narkotrafiku, është arrestuar sot në Berat.
Ai është identifikuar si Fatmir Isollari, alias Fatmir Cenka. Arrestimi i tij vjen pas një periudhe hetimesh, ku ai dhe grupi kriminal akuzohen për trafikun e 20 kg kokainë nga Shqipëria në Firence gjatë viteve 2002-2003.
Interpol Tirana po bashkëpunon me Interpol Romën për finalizimin e procedurave të ekstradimit të tij drejt Italisë.
Njoftimi i plotë:
Finalizohet nga Drejtoria e Forcës së Posaçme Operacionale, operacioni policor i koduar “Operacionalja 23”. I dënuar nga autoritetet italiane, me 7 vjet burgim, për pjesëmarrje në organizatë kriminale për trafikim të lëndëve narkotike, kapet në Berat dhe arrestohet me qëllim ekstradimin, 58-vjeçari.
Gjatë periudhës 2002-2003, kjo organizatë kriminale trafikoi 20 kg kokainë nga Shqipëria në Firence. Si rezultat i veprimeve operacionale të kryera pas koordinimit të informacioneve me homologët e Policisë italiane, në kuadër të operacionit policor “Operacionalja 23”, u lokalizua në qytetin e Beratit, u kap dhe u vu në pranga shtetasi:
Fatmir Isollari alias Fatmir Cenka, 58 vjeç, banues në Berat. Ky shtetas ishte shpallur në kërkim ndërkombëtar nga Drejtoria e Interpolit, pasi Gjykata e Apelit e Firences, Itali, në vitin 2023, e ka dënuar me 7 vjet burgim, për pjesëmarrje në organizatë kriminale për trafikim të lëndëve narkotike. Interpol Tirana po bashkëpunon me Interpol Romën, për të finalizuar procedurat për ekstradimin e këtij shtetasi, në Itali.
