Në prangat e policisë italiane ka rënë një 40-vjeçar shqiptar që jetonte në Bolzano të Italisë. Mbi të rëndojnë akuza të rënda si rrëmbim, torturë dhe keqtrajtim në familje. Viktimë e dhunës së pamëshirshme të shqiptarit do të ishte bashkëjetuesja e tij, e cila prej muajsh keqtrajtohej nga 40-vjeçari, sepse ishte xheloz.
Ngjarja ka marrë përmasa më të mëdha 10 ditë më parë, ngjarje për të cilën ai akuzohet për rrëmbim dhe torturë.
Sipas mediave italiane dhjetë ditë më parë ai e lidhi gruan në një karrige dhe e torturoi për dy orë dhe në dorë mbante një thikë të cilën ja ka drejtuar disa herë në gjoks. Ai nuk ia ka ngulur thikën, por prapë i ka lënë bashkëjetueses disa shenja.
Shqiptari e shoqëroi të shoqen në spital, por ajo u tha mjekëve se ra nga biçikleta e saj dhe nuk tregoi se ishte dhunuar për dy orë rresht nga bashkëshorti. Kjo gjë duket se nuk i ka bindur mjekët e spitalit të cilët njoftuan policinë dhe ata filluan të hetonin. Gruaja më pas u shpjegoi hetuesve se ajo ishte në të vërtetë viktimë e keqtrajtimit të partnerit të saj, i cili më pas u arrestua. Burri u la në “arrest me burg”, por përpara gjykatës ai nuk pranoi se ka ushtruar dhunë ndaj bashkëshortes së tij.
