Prestigjozja Bloomberg i ka kushtuar vëmendje arrestimit të kryebashkiakut të Tiranës, Erion Veliaj, për korrupsion dhe pastrim parash.
Në raportin e saj javor për Evropën Lindore, Bloomberg thekson se Veliaj, së bashku me bashkëshorten e tij, ka shpenzuar mbi 870 mijë euro për veshje luksoze dhe bizhuteri, ndërkohë që Shqipëria mbetet një nga vendet më të varfra të Evropës.
Gjithashtu, media ndërkombëtare ka raportuar edhe reagimin e kryeministrit Edi Rama në një transmetim të drejtpërdrejtë në Instagram, ku, për shkak të ndërprerjeve teknike, ai u nervozua, filloi të shante dhe goditi tavolinën me grusht.
Raportimi i Bloomberg vjen mes rritjes së presionit ndërkombëtar për luftën kundër korrupsionit në Shqipëri dhe përballjes së zyrtarëve të lartë me drejtësinë.
Reagimi i Bloomberg:
Arrestimi i kryebashkiakut të Tiranës, Erion Veliaj, për akuzat e korrupsionit, po dërgon valë tronditëse në ambientin politik në Shqipëri, një nga vendet më të varfra të Evropës. Prokurorët pretendojnë se Veliaj, një nga bashkëpunëtorët më të afërt të kryeministrit Edi Rama, përvetësoi fondet publike për të udhëhequr një mënyrë jetese luksoze, e cila përfshinte më shumë se 870,000 euro që gruaja e tij shpenzoi për mallra luksi si veshje dhe bizhuteri.
Po ashtu, ata gjetën afërsisht të njëjtën shumë në llogaritë bankare nën emrin e saj dhe para të gatshme në një kasafortë me vlerë më shumë se 100,000 euro. Ndërsa Veliaj dhe gruaja e tij mohojnë akuzat, mbrojtja e Ramës ndaj aleatit të tij në rrjetet sociale nuk shkoi ashtu siç ishte planifikuar. Pasi i quajti akuzat si të trilluara, Rama, i pavetëdijshëm se ishte ende live, u pa duke goditur grushtin në tavolinën e tij dhe duke sharë, në një video që është bërë virale. Kryeministri tha më pas se thjesht po tregonte “pasionin” e tij për Shqipërinë.
Veliaj u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Sipas SPAK nga të dhënat konkrete të mbledhura deri në këtë fazë të hetimit paraprak, në mënyrë të përmbledhur rezulton se, nga peronat nën hetim, specifikisht Veliaj edhe bashkëshortja e tij, Ajola Xoxa është ideuar, krijuar dhe vënë në funksionim një mekanizëm që ka synuar dhe ka bërë të mundur, në praktikë, marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të kundërligjshme.
