Andi Duraj, avokati i pronarit të UET, Henri Çili, është shprehur se klientit të tij, i janë shkelur të drejtat në momentin e arrestimit.
I ftuar në “Top Show”, Duraj tha se përgjimet mes avokatit dhe klientit nuk konsiderohen si provë.
Më tej ai shtoi se takimi me zyrtarin e lartë të drejtësisë nuk ka ndodhur kurrë.
“Kanë qenë dy avokatë që janë arrestuar. Janë shkelur në mënyrë flagrante të drejtat e mbrojtësve. Është kontrolluar zyra pa prokurorin. Madje edhe përgjimet konsiderohen si përgjime mes avokatit dhe klientit dhe nuk konsiderohet apo përdoret si provë. Janë të ndaluara me ligj. Ky është vetëm fillimi i shkeljeve. Akuza e parë ishte mashtrimi, arrestohen edhe mashtruesi dhe i mashtrueri. U arrestua e gjithë zyra ligjore dhe këtu fillon paradoksi. Paradoksi i dytë është ushtrimi i ndikimit të paligjshëm. Të gjithë mund të mbajnë përgjegjësi për ushtrim ndikimi të paligjshëm, vetëm avokati jo. O do akuzohet për korrupsion ose s’ka vepër penale. Sepse, ku do ta ushtronte këtë ndikim? Çdo avokat mund të bëjë takime dhe ndërmjetësim, por nuk ka ndodhur. Takimi me funksionarin e lartë të drejtësisë nuk ka ndodhur, shpresoj të jetë një pakujdesi,“, tha Duraj.
Pak ditë më parë Gjykata e Përmetit dha masat e sigurisë “Detyrim paraqitje” për Henri Çilin dhe administratorin e UET, Betim Shkupi.
E njëja masë u dha edhe për noteren Shpresa Gjoçaj, Kristina Bashin dhe Kejsi Meçon.
Në burg ndërkohë u lanë 16 persona.
Henri Çili u arrestua pak ditë më parë për një sërë akuzash, ku ajo më e rënda ishte ushtrim i ndikimit të paligjshëm tek funksionarët publik.
Ai u shpreh se bisedat e përgjuara janë brenda natyrës së punës.
Përsa i përket kunatit të tij, Gazmir Ajdini, Çili tha se duhet të mbajë vetë përgjegjësi nëse ka kryer shkelje ligjore.
