Ditën e sotme u mbajt seanca plenare në Kuvend, e para pas zgjedhjeve vendore që u zhvilluan më 14 Maj. Ndërkohë që arrestimi i fituesit të Bashkisë së Himarës, Fredi Belerit ishte një nga tematikat e diskutimit. Kreu i PBDNJ-së, Vangjel Dule nga Kuvendi ka dënuar rëndë arrestimin e Belerit teksa ka bërë thirrje që ky i fundit të lirohet sa më shpejt nga burgu. Dule akuzoi Ramën se fshihet pas këtij urdhri, ndërkohë që e konsideroi Belerin si të burgosur politik. Mes të tjerash ai pyet maxhorancën se ku po e çon këtë vend.
“Edhe me denigrimin, me blerjen e votës dhe kujtuam se i kishim parë të gjitha. Por sekti në pushtet na surprizoi sërish. Duke provuar se nuk njeh limite, verbëria e arrogancën i çoi deri në aktin që dëshmon tiraninë. Arrestimin e kandidatit rival dhe më pas fituesin e zgjedhjeve. Kush nuk shkon pas ujërave të komandantit, ndëshkohet. Komuniteti që guxon të krijojë liri, do ta paguaj. Ai që i prin komunitetit, burgoset. Kryetari i komunitetit himariotë, është i burgosur politik, është rrëmbyer nga sekti i Rilindjes. Eshtë marrë peng nga Edi Rama. Zoti Beleri është arrestuar në flagrancë për dyshime. Si mund ta ketë një kryeministër personalisht e qytetarë? Këtu çdo gjë është në duart e njëshit. Dëshiroj t’ju drejtoj një thirrje të fundit. Sot kreu i bashkisë së Himarës, duhet të shkojë në komunitetin himariotë. Janë njerëz të lirë dhe ndaj janë të lumtur. Nuk hezitojnë që për demokracinë të japin leksione. Bashkë me Belerin është marrë peng dhe Pandeli Kokaveshi, me të njëjtat akuza. Është njeri që ka bërë transplant zemre. Pavarësisht se kam njoftuar autoritetet më të larta dhe të drejtësisë, që nëse mbahet në burg, është në rrezik për jetën, por vazhdojnë ta mbajnë peng. Ka nisur dhe IKMT-ja hakmarrje. Objekti i legalizuar u rrethua nga qeveria, nga IKMT. Cili ishte mëkati i zotërisë së moshuar? Thjesht i biri kishte qenë numërues në zgjedhjet që zgjodhën fitimtar zotin Beleri. Ku po e çoni vendin o zotërinj? Deri sa të mbështesni një autokrat”, deklaroi Vangjel Dule në fjalën e tij në Kuvend.
