Një arratisje e pazakontë dhe e mirëorganizuar është regjistruar në Spitalin Rajonal të Durrësit, ku i paraburgosuri Altin Ndoci ka arritur t’u ikë nga duart efektivëve të Policisë së Burgjeve gjatë shoqërimit për vizita mjekësore.
Ngjarja ka ndodhur në pavionin infektiv të Spitali Rajonal i Durrësit, ku Ndoci ishte dërguar për kryerjen e procedurave mjekësore. Sipas të dhënave, ai ka goditur me grusht një nga efektivët që ndodhej në dhomë, është përplasur me punonjës të tjerë të sigurisë dhe ka arritur të largohet nga kati i tretë i godinës.
Pas daljes nga pavioni, Ndoci është larguar me vrap drejt parkimit të spitalit, ku dyshohet se e priste një automjet Audi i bardhë, me të cilin është larguar nga vendngjarja. Gjatë tentativës për ta ndaluar, një prej efektivëve ka qëlluar me armën e shërbimit në ajër, por pa rezultat.
Burime bëjnë me dije se zgjedhja e repartit të infektivit nuk ka qenë e rastësishme, pasi ky pavion ndodhet shumë pranë parkimit, çka tregon se arratisja ka qenë e mirëmenduar në detaje. Policia vijon kërkimet për Ndocin, i cili akuzohet se është i përfshirë në katër vrasje.
Pas ngjarjes së rëndë, është marrë masa administrative ndaj strukturave përgjegjëse. Është pezulluar nga detyra zinxhiri komandues i Burgut të Durrësit, ndërsa pritet verifikimi i plotë i rrethanave që çuan në këtë arratisje.
Në një deklaratë zyrtare, Drejtoria e Burgjeve bën me dije se i paraburgosuri Altin Ndoci është larguar nga ambientet e Spitalit Rajonal të Durrësit, ku ishte shoqëruar për vizita mjekësore. Sipas njoftimit, të gjitha procedurat mjekësore janë zhvilluar në repartin e infektivit, i cili ka repart sigurie për të dënuarit.
“Pavarësisht ndërhyrjes së menjëhershme nga forcat e Policisë së Burgjeve për ndalimin e tij, Altin Ndoci ka arritur të largohet nga spitali. Strukturat përkatëse janë vënë menjëherë në lëvizje dhe po punohet intensivisht për lokalizimin dhe kapjen e tij, si dhe për sqarimin e plotë të rrethanave të ngjarjes”, thuhet në deklaratë.
