Mediat italiane kanë zbuluar detaje të reja rreth arratisjes së Moisi Habilajt në Itali, e cila u zbulua ditën e djeshme nga një kontroll rutinë e policisë italiane për të dënuarit me arrest shtëpiak.
Sipas mediave, që prej të shtunës së kaluar telefoni i tij është i fikur dhe i paarritshëm.
Sipas mediave italiane është ende mister zhdukja e trafikantit shqiptar të drogës. Ata shkruajnë se ai ishte në arrest shtëpie në apartamentin e tij të vogël në San Michele di Ganzaria në provincën e Catania, në atë zonë që për dekada ka qenë territori referues i shefit të Cosa Nostra Ciccio La Rocca .
Duke iu referuar mediave italiane mësohet se Moisi Habilaj nuk mbante një byzylyk elektronik për të gjurmuar vendndodhjen e tij.
Habilaj mësohet se ishte në arrest shtëpie pasi u dënua me 15 vjet e 5 muaj burgim në një dënim të shkallës së parë. Ky dënim u konfirmua edhe në shkallën e dytë dhjetorin që lamë pas.
Për disa ditë Moisi Habilaj nuk ishte më në dispozicion dhe për momentin dhe siç konfirmojnë burimet hetimore ai raportohet si i arratisur.
Megjithatë, mbi këtë histori nuk ka asnjë lajm zyrtar nga forcat e policisë italiane. Avokatët që e mbrojnë Habilajn, kanë përjashtuar si mundësi ekzekutimin e një urdhri ekstradimi në Shqipëri, ku Habilaj është përballur me një hetim paralel me atë të gjyqësorit Italian.
43-vjeçari Habilaj, para se të shkonte në San Michele di Ganzaria, ishte burgosur në burgun Bicocca. Pastaj u transferua në qytetin e Calatina ku ai ishte mysafir i një të afërmi nga ana e babait për pak më shumë se një muaj. Më pas kaloi në një apartament të ri, por gjithmonë në territorin e San Michele di Ganzaria, dhe me leje transferimet vetëm në zyrën e tij të dentistit.
Habilaj pranoi të bisedonte me drejtësinë gjatë hetimit por nuk e fitoi statusin e bashkëpunëtorit më drejtësinë.
Pranimi i pjesshëm i akuzave u duku si një vlerësim pozitiv nga ana e autoriteteve por nuk iu lehtësuan rrethanat e akuzave.
Një hetim nga zyra e prokurorit të Katanias në tetor 2017 zbuloi ekzistencën e një kanali të vendosur për furnizim me drogë dhe armë midis Shqipërisë dhe Sicilisë .
‘Biznesi’ ndërkohë funksiononte nën hijen e klanit Cappello dhe familjes Cosa Nostra dei Santapaola-Ercolano.
Mediat italiane përmendin edhe ish-ministrin e Brendshëm Saimir Tahiri duke theksuar se Moisi Habilaj ishte kushëri i tij.
Kujtojmë se edhe vetë -sh-ministri i Brendshëm Saimir Tahiri, përfundoi i hetuar nga zyra e prokurorit të Katanias në dosjen mbi bandën e drejtuar nga 43-vjeçari i cili u arratis ditën e djeshme./Gazetareforma.com/
