Tre punonjës të burgut të Shënkollit janë arrestuar nga Shërbimi i Kontrollit të Brendshëm, pasi dyshohet se kanë neglizhuar detyrat e tyre, duke lejuar arratisjen e të dënuarit Daut Laze.
Të arrestuarit janë Gjin Ndoka, Tonin Nikolli dhe Zhaneta Mella, ndaj të cilëve rëndon akuza për “Shpërdorim detyre”, pasi në momentin e ngjarjes ishin në shërbim dhe nuk kanë zbatuar detyrimet e përcaktuara me ligj.
Mëngjesin e një dite më parë, gjatë ndërrimit të turneve dhe kryerjes së apelit në Institucionin e Posaçëm Mjekësor në IEVP Lezhë, u konstatua mungesa e Daut Hysen Lazes, 49 vjeç, lindur në Çorovodë dhe banues në Tiranë.
Ai ishte arrestuar më 16 nëntor 2021 për veprën penale “Dhuna në familje” dhe më vonë, me vendimin nr. 528 të datës 4 nëntor 2024 nga Gjykata e Shkallës së Parë në Tiranë, iu caktua masa “Mjekim i detyruar në një institucion mjekësor”, sipas nenit 46 të Kodit Penal.
Hetimet paraprake tregojnë se Laze ka shfrytëzuar hapësirat e sigurisë së dobët të institucionit për të dalë jashtë rrethimit dhe për t’u arratisur.
Sipas aktit të ekspertimit psikiatriko-ligjor, Daut Laze vuan nga një çrregullim i rëndë psikik, i klasifikuar si “çrregullim psikopatik paranoid”. Kjo është një sëmundje kronike që kërkon trajtim të vazhdueshëm dhe ndjekje mjekësore të rregullt.
Ekspertët konfirmojnë se ai ka qenë nën ndikimin e sëmundjes para, gjatë dhe pas kryerjes së veprës penale, duke mos qenë në gjendje të kuptonte veprimet e tij apo pasojat ligjore të tyre.
Pavarësisht kontrolleve intensive dhe shpërblimit prej 10 mijë eurosh për çdo informacion që mund të çojë në gjetjen e tij, policia ende nuk ka mundur të zbulojë vendndodhjen e 49-vjeçarit.
