Arjon Hasaj ka pranuar autorësinë e vrasjes së Ramazan Matajt, ngjarje e ndodhur më 4 janar në fshatin Dragoç të Postribës në Shkodër. Ai ka deklaruar për policinë se ka vrarë 33-vjeçarin Mataj me armë zjarri, duke marrë përgjegjësinë për krimin.
Ndërkohë, vëllai i tij, Klisman Hasaj, i dyshuar për sigurimin e kushteve për vrasjen dhe fshehjen e armës së krimit, ka mohuar çdo akuzë dhe ka thënë se nuk ka qenë në dijeni të veprimeve të vëllait. Arjon Hasaj ka shtuar se vrasja ka ndodhur për shkak të një lidhje të gjatë që viktima kishte me motrën e tij.
“Unë jam personi që e kam vrarë shtetasin Ramazan Mataj. Prej 6 vitesh ai kishte një lidhje me motrën tonë. Ramazani është personi që i ka prishur dy martesa motrës në 6 vitet e fundit. Ai këtë histori ia ka treguar shumë personave në fshat dhe më gjërë ndërsa është personi që divorcoi dy herë motrën tonë. Madje ka shpërndarë edhe disa video tek ish burri i dytë dhe tek njerëz të tjerë në fshat në momente intime me motrën. Unë hapa një llogari false në instagram me emrin e një vajze dhe lashë një takim me Ramazan Mataj. Ai erdhi dhe aty e qëllova me armë zjarri. Më pas armën e fsheha disa metra më tutje nga vendi ku e vrava. Pas vrasjes jam larguar me biçikletë drejt banesës. Armën e kam patur në shtëpi prej disa kohësh. Motra ka disa kohë që nuk jeton në banesën tonë, jetonte në Shkodër”, mësohet të ketë deklaruar Hasaj.
“Nuk kam patur asnjë dijeni për vrasjen që do kryente vëllai dhe nuk kam lidhje me atë ngjarje”, mësohet të ketë deklaruar Klisman Hasaj, vëllai i autorit.
Pas ngjarjes së rëndë, policia vendore e Shkodrës ka kryer përgjime në banesën e familjes Hasaj. Gjatë përgjimeve, dy vëllezërit kanë diskutuar për vrasjen e kryer nga Arjon Hasaj. Në një moment, ka dalë një informacion se autori, Arjon Hasaj, ka shprehur pendesë për fshehjen e armës dhe ka shkuar ta marrë sërish për ta groposur në oborrin e shtëpisë, duke e ruajtur për siguri.
Pas këtyre përgjimeve, policia arrestoi dy vëllezërit Hasaj si autorë të dyshuar të vrasjes së shtetasit Ramazan Mataj. Po ashtu, janë marrë në pyetje edhe familjarë të tjerë të viktimës dhe autorëve të dyshuar, ndërkohë që hetimet vijojnë për zbardhjen e plotë të ngjarjes.
